2019 jyly 15 qańtarda Shveısarıanyń Federaldy qylmystyq soty Qazaqstannyń Bas prokýratýrasynyń ótinishhatyn qanaǵattandyryp, «Qorǵas isi» boıynsha uıymdasqan qylmystyq toptyń músheleri zańsyz jolmen alǵan jáne keıinnen elden tys áketken 140 mln. teńgeni qaıtarý týraly sheshim qabyldady dep habarlaıdy Qamshy.kz aqparat agenttigi Qazaqstan Respýblıkasynyń Bas prokýratýrasynyń baspasóz qyzmetine silteme jasap.

Atalǵan qarjy toptyń belsendi músheleriniń biri, 2012 jyldan bastap osy iske qatysy bar degen kúdikpen halyqaralyq izdestirýde bolǵan Maǵzum Ábdiralıevke tıesili.

Osy jyldyń 25 sáýirinde Shveısarıadan Qazaqstan Respýblıkasy Ulttyq bankiniń shotyna túsken aqsha jaqyn arada memleket kirisine alynady. Buǵan deıin 2018 jylǵy sáýirde prokýratýra organdarynyń osy is sheńberindegi ótinish haty boıynsha memleket paıdasyna M. Ábdiralıevtiń 762 myń AQSH dollary men 915 myń teńge qylmystyq tabysy tárkilengenin atap ótken jón.

Osylaısha, urlanǵan aktıvterdi qaıtarý boıynsha jasalǵan jumystyń nátıjesinde memlekettik búdjetke túsken qarajattyń jalpy somasy 420 mln. teńge.

Qazaqstannyń Bas prokýratýrasy sheteldik áriptesterimen birlesip, qylmystyq tabystardy shetelden qaıtarýǵa baǵyttalǵan jumystardy jalǵastyratyn bolady.