Sheremetevo áýejaıyndaǵy ushaq apatynan qaıtys bolǵan 41 adamnyń qatarynda bort qyzmetkeri Maksım Moıseev te bar. Ol aqtyq demi qalǵansha jolaýshylardy qutqarǵan. Aeroflot avıakompanıasynyń qyzmetkeri Maksımniń adamdardy qaýipsiz jerge kóshirý barysynda tútinge ýlanyp qaıtys bolǵanyn aıtty. 

Maksım Moıveev nebári 22 jasta edi. Onyń týǵan týystary bolǵan oqıǵaǵa áli sene alar emes. Ol bala kezinen aspanǵa ushýdy armandaǵan. Keıin armanyn shyndyqqa aınaldyrý úshin ol Monındegi bastapqy ushý jattyǵýlary bar áskerılendirilgen Máskeý oblystyq mektep-ınternatynda oqydy. Óz mamandyǵy boıynsha 1 jyl 3 aı jumys istegen. 

— Jaýapkershiligi bar, senimdi jigit edi. Ol únemi basqalarǵa kómektesip júretin. Batyrlyq pen jankeshtilik únemi Maksımniń boıynan tabylatyn, - dep eske alady Maksımniń dosy Aleksandr.

— Tek óte jaqsy adam bolǵanyn aıta alamyn. Adal ári jaýapty jigit edi. Qıyndyqtan qoryqpaıtyn jáne óz basynyń qamy úshin ózgelerdi qıyn kezde tastap ketpeıtin, - deıdi dosy Andreı. 

Reseılik BAQ-tyń deregine súıensek, Maksım apat bolǵan ushaqtyń artqy jaǵynda órt shyqqan jerge jaqyn otyrǵan.  Maksımniń áriptesteri jolaýshylardy aldyńǵy esikten shyǵaryp jatqan kezde, Maksım taǵy bir shyǵatyn jerdi ashpaq bolady. 

— Onyń qolynan kelmedi. Bolmady. Keıin ol jolaýshylardy syrtqa shyǵarýǵa kómektesti. Sońyna deıin kómektesti. Biraq óziniń ómirin pıda etti, - deıdi áriptesi. 

 Aýdarǵan: Ásel Bolatqyzy