Prezıdenttikke úmitker kandıdattardyń biri –  Danıa Espaeva úgit-nasıhat jumysyn Almatydaǵy "Aqsaı-nan" zaýytynan bastady dep habarlaıdy Qamshy.kz aqparat agenttigi.

11 mamyr kúni keshki saǵat 18:00-de prezıdenttikke úmitker retinde resmı tirkelgen, OSK tóraǵasy qolynan «kandıdat» kýáligin alǵan azamattar saılaýaldy úgit-nasıhat jumystaryn bastap ketti. Olar aınalasy bir aı kóleminde eldi aralap, aǵaıyn-jurtpen kezdesip, Talap-tilekterin tyńdaıdy, saýaldaryna jaýap beredi. Saılaý kúni óziniń kandıdatýrasyn qoldaýǵa shaqyrady.

Derekkózderine súıensek, «Aq jol» demokratıalyq partıasy atynan prezıdenttikke úmitker retinde usynylǵan Danıa Espaeva óziniń alǵashqy saparyn Almatydan, naqtylaı ketsek, "Aqsaı-nan" naýbaıhanasynan bastady. Prezıdenttikke úmitker Danıa Espaeva men Májilis depýtaty Azat Perýashev bastaǵan shtab ókilderi almatylyq jumysshylarmen kezdesip, zaýyttyń jumysymen tanysty. Táýligine 150 tonna nan pisiretin bul zaýytta qazir 1500 adam jumys isteıdi. Olardyń árqaısysynyń óz tilekteri bar. Sheshilmeı júrgen, sheshe almaı júrgen máseleleri de az emes.

«Aq jol» QDP baspasóz qyzmetine súıensek, memleket tarıhyndaǵy tuńǵysh áıel-úmitker jáne Respýblıkandyq shtabtyń jetekshisi Azat Perýashev bastaǵan onyń jaqtaýshylary kásiporyn ujymyna saılaýaldy baǵdarlamanyń basty tustaryn aıtyp ótti: bıznesti qoldaý, ulttyq táýelsizdik jáne jemqorlyqpen kúres.

Kásiporyn ujymy Espaevanyń áleýmettik ónim kásipkerlerine (tamaq ónimderi, kıim-keshek, balalarǵa arnalǵan taýarlar) arnalǵan salyqty tómendetý, bıznes nesıeleýdiń ústemaqysyn tómendetý jáne nesıe merzimin uzartý týraly baǵdarlamalyq usynystaryna rızalyǵyn bildirdi.

Dánıa Espaeva men onyń shtab músheleri kezdesý barysynda qoıylǵan suraqtarǵa jaýap berdi.

Kásiporyn jumyskerleriniń kóp bóligi áıelderden turatyndyqtan kezdesýde zeınetkerlik jasqa baılanysty saýaldar qoıyldy. Sonymen qatar, qalada tirkeýi joq kópbalaly otbasylardyń járdemaqy jáne baspana alý múmkinshiligi týraly sóz qozǵaldy. Kombınatta ondaı analardyń sany kóp eken – olar úı jaldaǵanymen, úı qojaıyndary olardy tirkeýge alǵysy kelmeıdi.

«Bul máseleni qarastyrýǵa ýáde beremin. Kóptegen kásiporyndardyń jumyskerleri qalada tirkelmegen aýyldyń azamattary. Olardyń sany – ujymnyń jartysy da bolýy múmkin. Eger olardy jumystan shyǵarsaq – kásiporyndardyń jumysy toqtaıdy», - dedi Espaeva óz kezeginde.

Saılaýaldy shtab ókilderi 12 mamyr kúni Almatydaǵy «Jibek joly» bazarynda boldy. Birshama qıyn máselesi bar bazardaǵy saýdageler kezdesken qıyndyqtary týraly aıtyp, bazardaǵy kezdesý birneshe saǵatqa sozyldy. Saýdagerler óz talap-tilekterin Danıa Espaeva men onyń shtabyna hat túrinde jetkizdi.

Odan keıin kezdesý Almatydaǵy 65 jyldyń tarıhy bar «Temir-beton» zaýytynda jalǵasty. Shtab ókilderi 500-ge jýyq jumysshysy bar zaýyttyń jumysymen tanysyp, eńbekkerlermen kezdesti. Munda da jumysshylar zeınet jasy, áleýmettik kómek, turǵyn-úı jáne jer kezegi sekildi birqatar máselelerdi sóz etti. Ózderiniń ótinishterin úmitker Danıa Mádıqyzyna amanattady.

Ári qaraı Danıa Espaevanyń saılaýaldy úgit-nasıhat jumysy Taldyqorǵanda jalǵasatyn bolady.

Esterińizge sala ketsek, Danıa Espaeva – Táýelsiz Qazaqstan tarıhyndaǵy prezıdenttikke úmitker retinde tirkelgen tuńǵysh áıel kandıdat. Ol Májilis depýtaty, «Aq jol» partıasynyń ókili.

Prezıdent saılaýy 2019 jyldyń 9 maýsymy kúni ótedi.

Usynǵan: Maqpal Sembaı