Qazaqstan Respýblıkasynyń kezekten tys prezıdent saılaýyna qatysyp jatqan úmitkerlerdiń biri Ámirjan Qosanov halyqtan, naqtylaı aıtsaq, qaltaly azamattardan kómek surady dep habarlaıdy Qamshy.kz aqparat agenttigi.
El arasyna aty tanymal bolyp úlgergen belsendi kandıdat óziniń áleýmettik jelidegi paraqshasyna jazba jarıalap, saılaýdyń salmaǵy qaltasyna aýyr túsip jatqanyn, qaltaly hám tileýles azamattar bolsa kómek berýin surady. Jazba astyna ol óziniń banktegi esep-shottaryn qaldyrǵan.
Oqyrmanǵa túsinikti ári qolaıly bolýy úshin kandıdat jazbasynyń mátinin tolyq berýdi jón kórdik.
"Saılaýǵa túsemin dep sheshkende ózime erekshe áser etken eki nárse boldy.
Bir zeınetker aǵamyz "bir pensıamdy beremin!", al bir stýdent "páterde turatyn jeti jigit úsh myń teńgeden qosyp, 21 myń teńge bersek, az bolmaı ma?", - dep edi. "Ee, men de kerek ekenmin ǵoı elime!", - dep bir jasap qalyp edim.
Mine, saılaý naýqany bastaldy!
Sóıtsem, qarjy máselesi sheshýshi faktordyń biri eken!
Ózimniń jıǵan-tergenim bar, qarjyly jora-joldastar da bar. "Bir aılyq qana naýqanǵa sol jetkilikti bolyp qalar" dep oılaǵanmyn.
Sóıtsem, saılaýdyń salmaǵy basqasha eken!
Nasıhat materıaldaryn basyp-shyǵarý, olardy taratý, oblystardaǵy shtabtardy qoldaý, meniń jáne senimdi ókilderimniń issaparlary, kezdesý ótetin ǵımarattardy jalǵa alý, nasıhatshy jáne erteńgi kúni baqylaýshy bolatyn azamattardyń qyzmeti degen qomaqty qarjyny qajet etetin sharýa shash etekten eken. Sol sebepti aýdandyq shtabtardy qurý qıyn bop jatyr.
Sondyqtan da zańǵa sáıkes ashylǵan arnaıy esep-shotymdy jarıalap otyrmyn.
Onsyz da qınalyp júrgen aǵaıynǵa qolqa salǵanym yńǵaısyz bolar. Sondyqtan negizinen qaltaly azamattarǵa ótinish jasap otyrmyn.
Osynda biraz aǵaıyn elimizdiń túkpir-túkpirine shaqyryp jatyr. Oǵan rahmet! Biraq, barsha óńirdi sharlap shyǵýǵa osy qarjy jaǵy qolbaılaý bolyp otyrǵanyn qalaı jasyraıyn? Máselen, osy kúnderi mashına jaldap, respýblıkalyq shtab ornalasqan Astanaǵa jaqyn soltústik oblystardy aralaýdy bastadym. Sondyqtan da qol ushyn berem degen kez kelgen qarjyly azamatqa rıza bolar edim".
Birshama ýaqyt buryn redaksıasy OSK jarıalaǵan saılaý shyǵyndarynyń mólsherin oqyrman nazaryna usynǵan edi. Ol maqalaǵa kelesi gıpersilteme arqyly óte alasyz:
Usynǵan: Ádilet Mádenıet
