Bul jaǵdaı Qazaqstanda bolyp jatyr dep oılap qalmańyz. Túrikmenstanda oryn alyp otyr. Bir ǵana adamǵa baǵynǵan avtorıtarlyq beıtarap memleket Túrikmenstannyń basshysy Gýrbangýly Berdimuhamedov eldiń Mádenıet jáne BAQ  jónindegi vıse-premeri Bahargúl Abdyevaǵa eskertý jasady. Nege? Prezıdenttiń aıtýynsha, «Bahargúl hanym óz salasyna qatysty BAQ pen eldegi telearna salasynyń jumysyn nasharlatyp jibergen».

Osyǵan baılanysty prezıdent Gýrbangýly Berdimuhamedov  jumysynda olqylyqtar jiberip alǵany úshin Túrikmen memlekettik baspa qyzmetiniń tóraǵasy Aqmurat Hudaıberdıevke qatań sógis jarıalady. Bul eń sońǵy eskertý, munan deıin taǵy kemshilikter oryn alsa, ol qyzmetinen birjola qoshtasady. Sondaı-aq Berdimuhamedov «Nesil» gazetiniń bas redaktory Mahrıban Gaıdymovany da jumysynan bosatty. Ol munymen toqtaǵan joq. Osydan birneshe kún buryn túrikmen basshysy Memlekettik telearna, radıo habarlaryn taratý jáne kınematografıa komıtetiniń tóraǵasy Nurmambet Gardyevke de qatań sógis berdi.  «Miras» telearnasynyń basshysy Bıashım Ataev ta prezıdent buıryǵynan keıin  qyzmetinen ketken.  

Jalpy Túrikmenstan basshysy Gýrbangýly Berdimuhamedovke  otandyq BAQ pen telearnanyń jumysy unaı bermeıdi. Ótken jyly da ol eldegi birqatar BAQ-tyń basshylaryn ornynan bosatqan.

Prezıdent Gýrbangýly Berdimuhamedovtyń oıynsha, «memlekettik telearnalar men buqaralyq aqparat quraldary Túrikmenstannyń tańǵajaıyp damýy men ósip -órkendep, kórkeıgenin jalpaq jurtqa kórsete almaı otyr».