Sheremetevo áýejaıyndaǵy ushaq apatynan qaıtys bolǵan 41 adamnyń qatarynda qazaq jigiti de bolǵan dep jazady Qamshy.kz aqparat agenttigi. 

23 jastaǵy Navrýz Iskenderov daǵystandyq jolaýshylardy qutqaramyn dep qaıtys boldy. Kýágerlerdiń sózine súıensek, Navrýzdyń aman qalýǵa múmkindigi bolǵan. Alaıda ol jolaýshylardy qaýipsiz jerge shyǵarýǵa kómektesken. 

Avıakompanıa óz kezeginde ushaq apatynan qaıtys bolǵandardyń týǵan-týystaryna 5 mln rúbl beretinin málimdedi. Sondaı aq Daǵystannyń basshysy da Navrýz Iskenderovtyń otbasyna qarjylaı kómektesetinin aıtty. 

Alaıda Navrýzdyń ata-anasy da, týǵan baýyr-qaryndastary da joq. Onyń ákesi bala kezinde qaıtys bolǵan, al anasy birneshe jyl buryn onkologıalyq dertten kóz jumǵan. 

Navrýzdyń ákesi – qazaq, anasy – qumyq. Ákesiniń kózi tirisinde ol Qazaqstanda turǵan. Keıin anasynyń otany Daǵystanǵa qonys aýdarady. 

Sonymen birge, ushaqtyń ishindegi jantúrshigerlik vıdeony da Navrýz túsirgen. Onyń dostary Navrýzdy daýysynan tanyǵan. 

"Bul vıdeoda bireý "Barlyǵyń syrtqa shyǵyńdar" degen ofıserlik daýyspen aıǵaılaıdy. Bul – anyq Navrýzdyń daýysy. Ol teńiz flotynda ofıser bolǵan", - deıdi Navrýzdyń dosy Shamıl. 

Apatqa deıin Navrýz Iskanderov Qazaqstanǵa kelip úlgergen. Qazaqstanǵa kelip murnyna operasıa jasatqan, tisin emdetken. 

"Navrýz ázildeskendi jaqsy kóretin. Sondaı-aq sendire biletin. Keıde onyń ázilderine senip qalatynbyz. Keıin ózi keshiorim suraıtyn", - dep eske aldy dosyn Shamıl. 

Apat kezinde Navrýzdyń aman qalýyna múmkindik bolǵan. Sebebi ol ushaqtyń aldyńǵy qatarynda otyrypty. Biraq Shamıl Navrýzdyń bul múıkindikten óz erkimen bas tartqanyna senimdi. 

"Ol qıyndyqqa dýshar bolyp, ólim men ómirdiń ortasynda jatqan adamdardy tastap kete almaıtyn edi", - deıdi Shamıl. 

Eske sala ketsek, 5 mamyrda Máskeýden ushyp shyqqan Sukhoi Superjet - 100 ushaǵy apatqa ushyrap, Sheremetevo áýejaıyna qondy. Atalmysh ushaqta 78 adam bolǵan. Olardyń 41-i qaıtys boldy. 

Aýdarǵan: Ásel Bolatqyzy