Qazaqstan prezıdentine úmitker Ámirjan Qosanov feısbýk áleýmettik jelisindegi paraqshasy arqyly tikeleı efırge shyqty dep habarlaıdy Qamshy.kz  aqparat agenttigi. Tikeleı efır 40 mınýtqa sozylyp, ony 1000-nan asa feısbýk qoldanýshylary onlaın kórip otyrdy.

Efır barysynda Ámirjan Qosanov Qazaqstandaǵy qordalanǵan máselelerdi tilge tıek etip, qazirgi bıliktiń  avtorıtarlyq júıesine túpkilikti qarsy ekenin de ashyq aıtty.

«...Meniń osy ýaqytqa deıin túsingenim bir nárse. Búgin men sony saılaý aldynda aǵymnan jarylyp aıtqym keledi. Qazaqstandaǵy kóp balaly analardyń jaǵdaıynan bastap, el ekonomıkasynyń olıgarhtarǵa satylyp ketkenine deıingi kóptegen qordalanǵan problemalardy sheshýdiń bir ǵana joly bar. Ol mehanızm saıası reforma dep atalady. Onyń negizgi baǵyty "áı deıtin áje, qoı deıtin qoja joq" qazrigi bılikti táýbesine keltiretin halyqtyq baqylaý. Iaǵnı, halyq aýyl ákiminen bastap, qala, aýdan, oblys ákimderin jáne mınıstrler men depýtattardy, prezıdentti bárin ózi saılaýy kerek. Tipti sottardy da halyq saılaǵany durys. Mine, sol kezde ǵana bizdiń qoǵam ózgeredi»  dedi, Qosanov.

 Sondaı-aq, ol óz sózinde qazirgi Konstıtýsıaǵa túbegeıli ózgertý engizý kerektigin atap ótti.

«... 95 jyldan bastap halyqtan góri bir adamnyń soıylyn soǵyp júrgen Konstıtýsıaǵa túbegeıli ózgeris engizý kerek. Bizdiń Ata zańymyzda: "Qazaqstan halqy memleketegi bıliktiń birden-bir ıesi jáne qaınar kózi" dep jazylǵan. Biraq sóz júzinde olaı emes. Sondyqtan biz barlyq zańdarymyzdy, barlyq ekonomıkalyq sheshimderimizdi Konstıtýsıamyzdyń osy babyna sáıkestendirýimiz qajet. Jermen onyń baılyǵyn Qazaqstan halqynyń tolyqtaı menshigine aınaldyrýymyz qajet. Bul – úlken másele. Bul máseleniń oń sheshimin tabýyna birinshi kezekte olıgarhtar qarsy, kezinde jerdiń tabıǵı baılyqtaryna ıe bolyp qalǵan baıshekeshter qarsy, qaltalylar qarsy. Sondyqtan bizge olıgarhtardyń emes, halyqtyń qamyn oılaıtyn prezıdent, olıgarhtardyń emes halyqtyń qamyn oılaıtyn úkimet kerek» dep aıtty.

Mıat Káshibaı