QR prezıdentine úmitker Ámirjan Qosanov búgin, ıaǵnı 15 mamyr kúni Qaraǵandy halqymen kezdesedi, dep habarlaıdy Qamshy.kz aqparat agenttigi.
Bul týraly Ámirjan Qosanov áleýmettik jeli arqyly ótkizgen tikeleı efır barysynda málimdegen bolatyn.
Alǵashynda Qosanovtyń Qaraǵandy jurtshylyǵymen júzdesý orny qala syrtyndaǵy Úshtóbe degen jerde ornalasqan "Kýrmınka" qus fabrıkasy delingen. Qosanovtyń aıtýynsha kezdesý orynyn OSK bekitipti. Al bul jaǵdaı áleýmettik jelidegi kóptegen belsendeniń birden narazylyǵyn týdyryp, olar prezıdenttikke úmitker adamnyń kezdesýi qala syrtynda ótetinin quptamaǵan.
Qaraǵandylyq belsendilerdiń biri Aısultan Jaqypov feısbýk paraqshasy arqyly barlyq kandıdattarǵa jaǵdaı birdeı jasalý kerek ekenin aıtyp, OSK-nyń kezdesý ornyn qala syrtyna belgilegenin ádiletsizdikke balaǵan.
"Qazaqstan Respýblıkasy Prezıdenttigine úmitkerlerdiń biri, óz favorıtim Ámirjan Qosanov aǵamyzben kezdestim. Qaraǵandyda júr aǵamyz. Erteń osy jaqtaǵy saılaýshylarymen kezdesý. Qaı jerde ótetinin úsh múmkindikten tabýǵa tyryspaı-aq qoıyńyz. Ortalyq Saılaý Komısıasy óz jumysyn myqty atqarǵan eken. Nup Otan ǵımaraty dersiz, Shalqyma konsert zaly dersiz, Kenshiler mádenıet saraıy dersiz. Barlyǵy qate. "Laqtyń ǵo taǵy" dep jymıyp qana otyra berer))
Úshtóbedegi Karl Markc atyndaǵy qus fabrıkasynyń asqanasynda erteń 10.45 shamasynda kezdesý ótpek.
Qaraǵandy qaıda? Úshtóbe qaıda? Tıip turǵandaı kóriner. Degenmen de...
Kandıdattarǵa jaǵdaı birdeı jasalýy kerek shyǵar.
Qasaǵamdy Kýrmınka qus fabrıkasynan kórgim keledi.
Áýjekeńe suraq bolsa, erteń efırge shyǵamyz. Jerlester, kóńili Qosanov dep alaburtqan aǵaıyn, qalys qalmaı Úshtóbege kelińizder" - dep jazdy.
OSK-nyń bul árketine narazy bolǵan Qosanovtyń qaraǵandylyq qoldaýshylary qaltalarynan qarajat bólip, kezdesý ornyn "Dostar-Álem" qonaqúıine aýystyrǵan.
Bul týraly Facebook áleýmettik jelisiniń qoldanýshysy Bella Orynbetova habarlady.
"Qosanovtyń qaraǵandylyqtarmen kezdesýin joǵarydaǵylar aldymen Úshtóbedegi "Kýrmınka" qus fabrıkasyna belgilepti. Búkil Qaraǵandyda oryn tabylmaǵandaı. Ol birinshiden bireýdiń jekemenshik terıtorıasy, ekinshiden onda karantın eken.
Qaraǵandylyq belsendiler qarajat jınap kezdesýdi uıymdastyrdy. Iýgo-Vostoktaǵy burynǵy Sozvezdıe, qazirgi "Dostar-Álem" qonaqúıiniń konferens zaly. Búgin 15 mamyr saǵat 12-30. QOSANOV degen kim, ol ne usynady deseńiz, kelińiz" - dep jazdy B.Orynbetova.
Usynǵan: Mıat Káshibaı
