Almatyda úsh azamattyń – Jazıra Demeýova, Gúlzıpa Jáýkerova jáne Oksana Shevchýktiń ústinen elde tyıym salynǵan "Qazaqstannyń demokratıalyq tańdaýy" qozǵalysynyń qyzmetine qatysty degen aıyppen is qozǵaldy dep habarlaıdy Qamshy.kz aqparat agenttigi Azattyq  saıtyna silteme jasap.

Bul týraly Demeýovanyń advokaty Gúlnara Jýaspaeva habarlaǵan. Úsh azamatqa 405-baptyń 2-tarmaǵy (Ekstremızm men terorızmge baılanysty elde sot sheshimimen tyıym salynǵan uıymnyń jumysyna qatysý – red.) boıynsha kúdikti statýsy berilgen.

Demeýova, Shevchýk jáne Jaýkerova 1 mamyrda Almatyda ótken narazylyq kezinde ustalǵan. Polısıa olardyń keıbirin 9 mamyrda da qamaýǵa alǵan.

Jýaspaevanyń sózinshe, 1 mamyrdaǵy narazylyqtan soń "beıbit jıyn ótkizý erejesin buzdy" dep tanylyp, 50 500 teńge aıyppulǵa kesilgen eki azamattyń – Demeýova men Jaýkerovanyń ústinen tap sol fakt boıynsha qylmystyq is qozǵalǵan. Jýaspaeva "bul zańǵa qaıshy" deıdi. Jazıra Demeýova 9 mamyr kúngi paradqa qatysýǵa barǵanyn, biraq polıseıler alańda júrgen 26 jastaǵy qyzyn ustap áketken soń ózi de Almaty qalalyq polısıa departamentine barýǵa májbúr bolǵanyn aıtady.

«Eshteńe istemesem de, qyzymdy áketý úshin polısıa departamentine bardym. Sondaǵylar jeke kýáligimdi kóre sala, qolyma kisen salyp, ústimnen ekstremızm baby boıynsha is qozǵalǵanyn aıtty. Artynsha úıime aparyp, tintý júrgizdi. Búkil gadjetti, kompúterdi, fleshkamdy alyp qoıdy. Munan soń qaıta departamenke kelip, meni 48 saǵat jertólede tergedi», - dedi Demeýova.

Úshinshi kúdikti Oksana Shevchýkti Almaty qalalyq polısıa departamentiniń tergeýshisi Tolǵanaı Erjanova tergegen.

İshki ister mınıstrligi 1 mamyrda Nur-Sultan men Almatyda shamamen 80 adamnyń ustalǵanyn habarlady. Alaıda naqty qansha adamnyń ákimshilik jaýapqa tartylǵany týraly derek joq.

Usynǵan: Marjan Sábet