90 -jyldary óte úlken tanymaldylyqqa ıe bolǵan "Love is…" saǵyzyn bilmeıtin jan joq shyǵar? Love is… saǵyzy ótken ǵasyrdyń 70 jyldary paıda bolǵan . Saǵyzdyń halyqtyń súıiktisine aınalýyna tańǵajaıyp mahabbat oqıǵasy sebepker dep jazady Qamshy.kz aqparat agenttigi.
Túrkıalyq kompanıa bul sýretterdi saǵyzben birge shyǵardy. Romantıkalyq oqıǵalar beınelengen anımasıa álemniń kóptegen tiline aýdarylyp, jańa keıipkerlermen salyna bastady. Mysaly, Túrkıada hıdjaptaǵy qyz ben uldyń mahabbat oqıǵasy beınelendi.
Saǵyzdyń sol kezde brendke aınalýyna tańǵajaıyp mahabbat oqıǵasy sebepker bolǵan. Sýretterdiń shynaıy avtory jańa zelandıalyq karıkatýrıst qyz Kım Kazalı 1970 jyldary romantıkalyq taqyryptaǵy mahabbatqa toly anımasıalyq múltfılmderimen álemge tanymal boldy.
Kım Jańa Zelandıadan basqa qalaǵa ketýge sheshim qabyldaıdy. 60- jyldardyń aıaǵynda ol óziniń súıiktisi Roberto Kasalıdi kezdestiredi. Eki jas bir-birimen taýda shańǵy teýip júrgende tanysady.
Olar kezdesip júrgende bir-birine hat joldaıdy. Hattar qyzyqty bolýy úshin Kım onda túrli sýretter salady. Robert súıiktisiniń salǵan sýretterin tastamaı jınap júredi. Keıinnen dostary bul sýretterdi jarıalaýdy usynady. Osylaısha bul ashyq hattyń tanymaldylyǵy arta beredi.
70-jyldardyń aıaǵynda Kım Los Angeles Times-qa arnalǵan alǵashqy tapsyrysyn alady. Olardyń keıipkeri álemge tanymal sary shashty qyz ben qara tory ul boldy. Olardyń áıgili bolǵany sonshalyq, sýretter saǵyzdyń qorabyna salyna bastady. Kım de ájeptáýir tabys tapty.
Keıin olar úılenip, toı jasaıdy. Dúnıege Stefano, Darıo jáne Mılo esimdi úsh bala keldi. 1975 jyly Roberto Kasalıge qaterli isik dıagnozy qoıylyp, bir jyldan soń kóz jumdy. Dál sol jyly onyń kenje balasy dúnıe esigin ashty.
Jary baqılyq bolǵannan keıin Kım sýret salýdy toqtatyp, uldarynyń tárbıesimen aınalysty. Onyń da súıeginen qaterli isik anyqtalyp, 56 jasynda ómirden ozdy. Al, olardyń uldary óner men kompúterlik grafıka salasynda myqty maman bolyp qalyptasty.
Osylaısha qarapaıym juptyń mahabbat oqıǵasyn búkil álem bildi. Olardyń mahabbaty qýanyshpen aıaqtalmasa da, sýrettegi beıneleri kóp adamdy ómirdi súıýge, mahabbattyń baıandy bolýyna úıretti.
