Búgin májilistiń jalpy otyrysynda depýtat Káribaı Musyrman aqparat jáne qoǵamdyq damý mınıstri Dáýren Abaevqa depýtattyq saýal joldady dep habarlaıdy Qamshy.kz aqparat agenttigi sputniknews.kz saıtynyń málimetine súıene otyryp. Bir top depýtat telearnalardyń jumysyndaǵy ózekti máselelerdi kótergen.

"Keıbir telearnalarda ulttyq qundylyqtarymyzdy nasıhattamaq túgil, olardy óreskel burmalaıtyn, tipti neshe túrli azǵyndyqty ashyq dáripteıtin teleónimderdi kórsetý tyıylmaı tur. Máselen, jýyrda "Óz oıym" baǵdarlamasynda abyroıyn aqshaǵa satatynyn jarıalaǵan qazaq qyzynyń shekten shyqqan uıatsyz qylyǵy men ony osyndaı róldi oınaýǵa úgittep kóndirgen telearna qyzmetkerleriniń "atyn shyǵarý úshin jer órteýge" deıin baratyn teris pıǵyly jurtshylyqtyń oryndy ashý-yzasyn týǵyzdy", - dedi depýtat.

Depýtattyń aıtýynsha, Qazaqstannyń tuńǵysh prezıdenti usynǵan "Týǵan jer" jáne "Aýyl el besigi" baǵdarlamalary memlekettik telearnalarda jetkilikti deńgeıde nasıhattalmaı júr.

"Osy oraıda respýblıkalyq búdjetten memlekettik-aqparattyq saıasatty júrgizýge bólingen qarjy jyldan-jylǵa kóbeıtilip otyrǵanyn eskersek, máselen, byltyr 46 mıllıard 587 mıllıon teńgeden astam, al bıyl 49 mıllıard 482 mıllıon teńge bólingen. Osynsha qarjynyń tıimdiligi qandaı degen suraq týyndaıdy", - dedi Káribaı myrza.

Depýtat respýblıkalyq jáne óńirlik BAQ basshylarynyń jáne qyzmetkerleriniń qatysýymen "Rýhanı jańǵyrý" baǵdarlamasyn aqparattyq qamtamasyz etýdiń ózekti máselelerin keńinen talqylaýdy uıymdastyrýdy usyndy. Sondaı-aq, BAQ-ta ulttyq qundylyqtardy, salt-dástúrlerdi, qazaqstandyq qoǵamda qalyptasqan adamgershilik prınsıpterin qatań qadaǵalaý kerektigin atap ótti.

"Qajettigine qaraı, qoldanystaǵy zańnamaǵa tıisti ózgerister engizý máselesi qarastyrylsyn", - dedi májilis depýtaty.

Usynǵan: Dáýren Sybanbaı