Mamyr aıynyń orta sheninde dalanyń erkesi – aqbóken tóldeı bastaıdy. Jaratýshynyń sheberligine shek joq qoı. Dál osy ýaqytpen tuspa-tus, ıaǵnı, jańa tól aıaqqa turyp ketkenshe aýa-raıy qubylmaly bola bastaıdy. Muny qazaq "Quralaı salqyny", "Quralaı jeli" dep atap ketken.

Osy erekshe hám tańdaı qaqtyrarlyq qubylys týraly belgili jýrnalıs Nurbek Bekbaý óziniń áleýmettik jelidegi paraqshasyna jazba jarıalady.

Zertteý maqalalary kóptiń kókeıindegisin dóp basatyn jýrnalısiń jazbasyn oqyrman nazaryna tolyq usynǵandy jón sanap otyrmyz.

"Osy deımin de, kıikter nege basqa emes, osyndaı sýyq kúnderi tóldeıdi eken?! Qısynǵa salsań, tóliń "júgirip" ketýi úshin, aýa raıy jyp-jyly kezde týǵan jón emes pe? Al, nege kıikter logıkaǵa kereǵar, óńmenińnen óter sýyqta týady? Jaratqannyń danalyǵy bar munda! Eger jyly kúnde tóldese edi, jańa týǵan qozynyń kindigi ystyq aýadan tez bitpeı, oǵan shybyn qonyp, irińdep, sońyra mert bolar edi. Sondyqtan, bókender aýa raıy 3° gradýsqa deıin tómendep ketetin "quralaı salqynynda" jappaı týady, bul kezde qalshyldaǵan sýyq júrip, shirkeı bitken tyǵylyp qalady!!!

Sosyn, deneńdi qarıtyndaı sýyq kúnder - dalanyń negizgi jyrtqyshy qasqyrdy buıyǵy kúıge túsiredi. Ol jaryqtyq, tup-týra 3 kúnge tábeti joǵalady, eshteńege zaýqy bolmaı, apanynda jatady da qoıady. Al kıik osy úsh kúnde jappaı týyp úlgeredi. Sol 3 táýlik ishinde qutaqandaı-aq quralaılar attyly adamǵa jetkizbes júırik bop úlgeredi.

Qudaıdyń keremeti ıá?! Eger osy sýyq bolmaǵanda, Arqadaǵy táltirek mıllıondaǵan quralaıdy shybyn-shirkeı talap, qasqyr parshalap, Uly Dala jyrtqyshtardyń Pır-dastarhanyna aınalyp keter edi á?!"

Usynǵan: Ádilet Mádenıet