Shýchınsk qalasynda QR Prezıdenttigine úmitker Sádibek Túgeldiń "Ulaǵatty urpaq-ulttyq ustanym" atty shyǵarmashylyq keshi ótkizildi dep habarlaıdy Qamshy.kz aqparat agenttigi. Bul kesh týraly aqparat úmitkerdiń jelidegi paraqshasynda jarıa etildi. 

Mádenıet jáne óner qyzmetkerleri kúni qarsańynda ótkizilip otyrǵan keshtiń maqsaty-mádenıet pen ónerdi qoldaý, ulttyq qundylyqtardy ulyqtaý, saılaýshylarmen kezdesý.

Kesh barysynda QR Prezıdenttigine kandıdat Sádibek Túgel shyǵarmashylyǵyna arnalǵan beınerolıkter kórsetilip, jergilikti ánshiler Gúlim Qudysbek, Araılym Saqytbaı, Ómirzaq Qurbanov ónerlerin kórsetti.

Óz kezeginde sóz alǵan tanymal jazýshy-jýrnalıst, qoǵam qaıratkeri, "Halyq súıiktisi-2017" Ulttyq syılyǵynyń ıegeri Sádibek Túgel "Uly Dala qyrandary" mádenı-áleýmettik qozǵalysynyń atynan Prezıdenttikke úmitker retinde qoǵamdyq deńgeıde óz taraptarynan atqarǵan jumystary, jastardy otansúıgishtikke baýlýdaǵy birlestiktiń orny jaıly áńgimelep, keshke qatysýshylar qoıǵan saýaldarǵa jaýap berdi.

Kandıdattyń senimdi ókili Talǵat Omar Sádibek Túgeldiń qolyna alǵan isin árqashan sońyna deıin jetkizetin tabandylyǵy men ulttyq qundylyqtardy ulyqtaýdaǵy erekshe erik-jigeri jaıly aıta kele, onyń shyǵarmashylyǵyn da qatar alyp kele jatqandyǵyna da toqtaldy.

"Sádibektiń osynsha qajyr-qaıratty qaıdan alatynyna qaıran qalamyn. Kitabyn da jazady, qoǵamdyq jumysty atqarýǵa da ýaqyt tabady, Qulagerdeı tulparǵa eskertkish te salady. Bárine qalaı úlgeredi",- dedi Talǵat Omar.

Prezıdentikke úmitkerdiń Aqmola oblysyndaǵy senimdi ókili Erbolat Sezhan "Sádibek Túgel shyǵarmashylyǵynyń ishinde jas urpaq boıyna rýh beretin qazanat taqyryby men eldik máselesi basty orynda. Búgingi kezdesýdiń mańyzdylyǵy jastar qoǵamnyń qozǵaýshy kúshi retinde osyndaı tulǵalardan úlgi alýǵa tıis", - dedi.

Aqmola oblysy boıynsha "Uly Dala qyrandary" RQB tóraǵasy, kandıdattyń senimdi ókili Qumarǵalı Jaıymuly Sádibek Túgeldiń qozǵalystyń jumysyn jandandyryp, ıgi isterdiń bastamashysy bolyp alǵa jetelep kele jatqandyǵyna toqtalyp óziniń shyǵarmashylyq ıesine arnalǵan arnaýyn oqydy. Kesh barysynda Sádibek Túgeldiń elordanyń tuńǵysh baspasóz hatshysy, jýrnalısıka salasyndaǵy eleýli eńbegin de áriptesteri tilge tıek etti. Aıta ketsek, is-sharada avtordyń eńbekterine arnalǵan kitaptar men fotosýretter kórmesi uıymdastyryldy.

Usynǵan: Ádilet Mádenıet