QR kezekten tys prezıdent saılaýy bastalǵaly beri áleýmettik jelilerde suhbat alańdary men túrli janrdaǵy jazbalar qatary kóbeıdi. Sondaı suhbat alańdarynyń biri belgili jýrnalıs Janbolat Mamaıdyń enshisinde. Iýtýbtaǵy "Azat arna" ataýymen belgili bolǵan suhbat alańyna kelgen kezekti qonaqtardyń biri, belgili rejıser Erkin Raqyshev saılaý týraly óz oıyn bildirdi dep jazady Qamshy.kz aqparat agenttigi.

Janbolat Mamaı arnasyndaǵy kezekti shyǵarylymyna qonaq retinde rejıser Raqyshev pen jýrnalıs Rysbek Sársenbaıdy shaqyrǵan.

"Saılaý aldynda azamattyq qoǵam ekige jarylyp tur: biri Qosanovty qoldasa, endigi bir shoǵyry saılaýǵa boıkot jarıalaýdy jón sanaýda. Kópshilik azamattar Ámirjan Qosanovty halyq arasynan shyqqan "Barlyq úmitkerlerge hám bılikke qarsy úmitker" dep tóbelerine kóterip jatsa, kelesi top Áblázovtyń nasıhaty arqyly jáne basqa toptardyń úgiti arqyly bul naýqanǵa belsendi boıkot jarıalap otyr", - dep bastady sózin jýrnalıs Mamaı.

Qyzyqty qarańyz! "Azat arnaǵa" qonaq bolyp kelgen eki azamat ta joǵaryda aıtylǵan qos múddeni qoldap júrgender qatarynan. Rejıser Raqyshev Qosanovty qos qoldap qoldasa, Rysbek Sársenbaı belsendi boıkot jarıalaǵandardyń jaǵyna shyǵypty.

"Meıli, ol saıasatta 20 jyl, meıli 30 jyl júrsin, bul "oıynnyń" sharty ýaqyt ótilin sanamaıdy. Másele myna suraqta: Qosanov saılaýda jeńip shyqqan kúnniń ózinde bılikti ustap tura alady ma? Ustap turýǵa onyń áleýeti jetedi me? Qazirgi bılikke qarsylyq kórsetýge qaýqarly ma? Bul jerde kóp másele bar. Biz boıkotty nelikten jarıalap otyrmyz?", - dep sózin rıtorıkalyq suraqtan bastaǵan Rysbek Cársenbaı óz saýalyna ózi jaýap berýge tyrysty.

Onyń aıtýynsha, Qosanovtyń barlyq ıdeıasy durys-aq. Degenmen, ol jerdegi bılikti baǵyndyrý úshin kúsh kerek. Ol kúsh Qosanovtyń ýysynda bar ekendigine belgili jýrnalıs kúmán tanytty.

"Qosanovtyń saılaýaldy baǵdarlamasynyń ózi kóptegen suraqtarǵa jaýap beredi. Onyń bılikke qarsy shyǵyp, eger prezıdent bolǵan kúnde kúlli parlamentti taratyp, jemqorlyqty joıamyn, sheteldikterge jerdi satpaımyn, halyq múddesine jumys jasaıtyn zań qabyldaımyn degen sózderiniń ózi halyqqa dem beredi, onyń ýádesiniń nyq, pıǵylynyń taza ekenine kepildik beredi. Qosanov – basqa úmitkerlerdiń barlyǵynan erek turǵan kandıdat", - dedi belgili rejıser Erkin Raqyshev.

Al bul sózder Rysbek Sársenbaıdyń myqtap bekigen saıası pozısıasyn, kózqarasyn ózgertýge qaýqarly bolmady. Ol boıkotty kimge jarıalap otyrǵanyn túsindirip berdi.

"Biz boıkotty Qosanovqa emes, saılaýǵa jarıalap otyrmyz. Qosanov qatyssyn, ózin dáleldesin, tipti, jeńiske jetsin. Oǵan eshqandaı qarsylyq joq. Biraq bizge mundaı memlekettiń, qazirgi bıliktiń senarıimen jasalyp otyrǵan saılaýdyń túkke qajeti joq", - dep týrasynan qaıyrdy Rysbek Sársenbaı.

Sondaı-aq, ol bul saılaýdyń naýqanynda bireýdi jaqtap, bireýdi dattaýdyń qajeti shamaly ekendigin aıtty.

"Qyzylkeńirdek bolyp qaıtemiz? Odan da osy saılaýǵa, qaraý saılaýǵa halyq bolyp qarsy turaıyq", - dedi Rysbek Sársenbaı.

Rysbek Sársenbaıdyń aıtqan pikirlerine qarsy sóz aıtamyn dep emosıasyna erik bergen Erkin Raqyshev kelesi ýájin alǵa tartty.

"Sizder nege saılaýǵa ǵana boıkot jarıalaısyzdar?! Eger qarsylyqtaryńyz ras bolsa, osy ýaqytqa deıin "myna zańdaryńyz durys emes, biz buǵan boıkot jarıalaımyz" dep nege aıtpaısyzdar? Saılaý kezinde ǵana boı kórsetemiz. Endi bári kesh. Poıyz júrip ketti. Biz halyqty túrli baǵyttarǵa tartyp shatastyrýdamyz. Bul – baryp turǵan arandatýshylyq".

Qyrǵyn debattyń aqyry Rysbek Sársenbaıdyń Qosanovqa usynysymen aıaqtaldy.

"Eń qaıyrlysy – Qosanov saılaý bolatyn kúni ózine de, basqa úmitkerlerge de daýys berýden bas tartsyn. Bul onyń eń úlken jeńisi bolmaq. Eshqashan eldik, halyqtyq múddeni jeke múddege aıyrbastaýǵa bolmaıdy", - dedi ol.

Jýrnalısiń aıtýynsha, eger Ámirjan Qosanov osyndaı málimdeme jasasa, ózi de qatelespeıdi, halyqty da týra jolǵa bastaıdy-mys.

Ýshyǵyp kele jatqan "uly" daýdyń betin baǵdarlama júrgizýshisi Janbolat Mamaı áp sátte buryp úlgerdi. Qos qonaǵynan ózge kandıdattar týraly pikirlerin suraǵan ol aýyzbirshilikti jaýap aldy.

Raqyshev pen Rysbek Sársenbaıdyń aıtýynsha, basqa kandıdattardyń ashyq pikir bildirip, belsendilik tanytpaǵanyna qaraǵanda, olar – adam sanyn kóbeıtý úshin dodaǵa qosylǵandar.

Rejıser Sádibek Túgeldiń ultjandylyǵyn, el úshin qyzmet jasap júrgenin eskergenimen, onyń qorjynynda eshqandaı "shans" joq ekenin kesip aıtty.

Bizge keregi – daý-damaı men jaǵa jyrtys emes. Bizdiń qalaýymyz, halyq qalaýy – ádil saılaý men buqara ahýalyn kótere alatyn kandıdattyń jeńisi.

Daıyndaǵan: Ádilet Mádenıet