Almatynyń eńseli kósheleriniń biri Buqar Jyraý gúlzarynyń boıynda, Esentaı ózeniniń jaǵasynda ornalasqan "Buqar Jyraý Taýers" turǵyn úı keshenin almatylyqtardyń birqatary bilýi tıis. Búgin sol keshen turǵyndary úrdiske aınalyp ketken kezekti jınalysyn jasady.
"Turǵyndar jınalys jasaǵaly jatyr" degen habardy estip, tórt bloktan turatyn turǵyn úı keshenine biz de jettik entelep. Bıik ári alyp qorǵandar arasyndaǵy alańqaı ispetti orynda birneshe adam qarasy baıqalady. Mıkrofondar, ústelder qoıylypty. Uıymdastyrýshylar jaǵy qarbalas kórinedi. Árbiriniń qushaǵynda bir-bir papqa qaǵaz.
Kópten kútken jınalysymyz da bastaldy. Uzyn sany elý-alpys adamdy jýyqtaıtyn jıyn músheleri jıyn bastalysymen-aq óz ýájderin aıta bastaǵan. Biraq bul jıyn óte tıanaqty uıymdastyrylǵan eken. arnaıy reglamenti, jarǵysy bar degendeı.
Resmı jıyndardyń izimen alańqaıda ótken jınalys ta óz tóraǵasyn saılaýdan bastaldy.
"Qurmetti, kórshiler! Men №490 páter turǵynymyn. Esimim – Shaımaǵambetov Marat. Osy jıynnyń uıymdastyrýshysy retinde jınalys tóraǵasy etip Mahmetov Mırbolatty jáne onyń hatshysy qylyp Makarova Elenany saılaýdy usynamyn", - dep bastaldy daýly máseleni sheshýge jınalǵan kópshiliktiń basqosýy.
Osydan keıin jınalys tóralqasy kún tártibindegi máseleler men taldanatyn máseleler tizimin jarıalady.
Osy tusta sóz ıiriminde aıta ketelik, "Buqar Jyraý Taýers" turǵyn úı kesheni 10 jyldan astam ýaqyt sheńberinde "Adal Servıs" JSHS basshylyǵynda bolǵan. Osy merzim ishinde atalmysh jaýapkershiligi shekteýli seriktestik turǵyndardyń kóńilinen shyǵýdyń ornyna olardyń narazylyǵyn týǵyzǵan.
Qazir turǵyn úı kesheniniń turǵyndarynyń kópshiligi jıi jınalyp, ózderin ózderi basqarýdy, ıaǵnı, PIK (Páter ıeleriniń kooperatıvi) qurý máselesin talqylap keledi.
Búgingi biz barǵan aýqymdy basqosý da osy maqsatta uıymdastyrylǵan. Qazir turǵyndar pikiri ekige jarylyp otyr. Bir bóligi "Adal Servıs" JSHS basshylyǵynda qala berýdi durys dep tapsa, ekinshi bóligi PIK qurýdy jón sanaıdy.
Búgingi jıynnan bul eki baǵytqa qarsy úshinshi toptyń da paıda bolǵanyn baıqadyq. İri toptardyń pikirimen kelispeı, jıynnyń shyrqyn buzǵan birli-jarym adam jańadan qurylǵaly otyrǵan PIK basshylyǵyna "Buqar Jyraý Taýerstiń" turǵyny Berik Oryntaıulynyń kelgenin qalamaıdy. Al álgi PIK qurýdy múdde tutyp júrgen turǵyndar tobynyń tóraǵalyqqa usynyp otyrǵan jalǵyz kandıdaty – osy Berik Oryntaıuly esimdi azamat.
Jıynǵa tek turǵyndar ǵana emes, jýrnalıser, sondaı-aq Almaty turǵyn úı saıasaty komýnaldyq memlekettik mekemesinen arnaıy ókil qatysty.
"Zańnamaǵa sáıkes, turǵyndardyń óz tańdaýyn jasaýǵa quqyǵy bar. Sondaı-aq, iri turǵyn úı keshenderin belgili bir JSHS nemese turǵyndar arasynan qurylǵan PIK basqarýy tıis. Sizderdiń taraptan osy ǵımaratty 10 jyldan asa ýaqyt basqaryp kelgen "Adal Servıs" JSHS ústinen Almaty qalalyq turǵyn úı saıasaty basqarmasyna aryz-shaǵym kelip tústi.
Ákimshilik basqarý mekemesiniń ókilinen keıin minber tizgini turǵyndar ýysyna ótti.
"Qaıyrly kún, qurmetti kórshiler! Meniń esimim – Jomartova Álıa. №427 páter turǵynymyn. Qurmetti kórshiler, mine, birshama ýaqyttan keıin bizdiń úıimizdi «Adal Servıs» JSHS basqaryp kele jatqanyna 11 jyldyń júzi tolady. Osy ýaqytqa deıin atalǵan seriktestik turǵyndarǵa eshqandaı esep bergen joq. Jınap jatqan qarajatymyz da az aqsha emes. Bizdiń jınaǵan qarjymyz bir qaltany baıytýda. Bizdiń aqshamyzdyń esebinen kórshi turǵan "Prestıj" jáne "Mechta" turǵyn úı keshenderin turǵyzdy. Biz buǵan kóz juma qaraı almaımyz. Men ózimiz basqaratyn PIK-ti qurýdy qoldaımyn", - dedi turǵyndardyń biri Jomartova Álıa.
Sondaı-aq, elektr júıesiniń kórshi ǵımarattarǵa zańsyz taratylýy men kúzet agenttiginiń salǵyrt jumysy, jedelsatynyń zańsyz tartyp alynýy da turǵyndardyń yzasyn keltiredi. Al bul suraqtarǵa jaýap berýge "Adal Servıs" JSHS basshylyǵy qulyqsyz.
"Meniń esimim – Ǵalym Meıram. №427 páter turǵynymyn. Meni turǵyndardyń basym kópshiliginiń PIK qurýǵa degen qoldaýy qýantady. Bizdiń 4-bloktaǵy jaǵdaı tipti múshkil. Turǵyndardan jedelsaty zańsyz tartyp alyndy. Al biz aı saıyn "Almaty Lıft" mekemesine jedelsatyny qoldanǵanymyz úshin aqsha tólep kelemiz. Bizdegi jumys jasap turǵan jedelsatyny 30 mınýt kútemiz. «Adal Servıs» JSHS basshylyǵy bul máselege bas aýyrtqysy kelmeıdi. Sondyqtan, men Berikti jáne PIK-ti qoldaımyn», - dedi mıkrofon alǵan Ǵalym Meıram esimdi turǵyn.
Máseleniń túbin qazbalaı berse, taýsylar túri joq. Bas-aıaǵy bir saǵatqa josparlanǵan jıyn eki jarym saǵattan astam ýaqytqa sozyldy. Aıtylýy tıis taǵy bir sumdyq jaǵdaı – birneshe mıllıondar turatyn elektr energıasy jelisiniń kórshi ǵımarattarǵa zańsyz taratylýy.
"Men de PIK qurýdy jáne ony Berik Oryntaevtyń basqarýyn qoldaımyn! Biz aı saıyn elektr energıasyn qoldanǵanymyz úshin qomaqty qarajat tóleımiz. Bizge belgili bolǵan aqparattarǵa súıensek, jalpy kólemi 9 mıllıon teńgeni quraıtyn elektr energıasynyń jelisi kórshi ǵımarattarǵa taratylǵan. Al ol ǵımarattar "Adal Servıs" JSHS enshisinde. Bizdiń qarajatymyz ózge qaltalarǵa quıylýda. Buǵan keıbir kórshilerimiz sengisi kelmeıdi. Men aıtqan faktini bizdiń turǵyn úı keshenimizdiń arnaıy mamandary da rastaıdy. Men jem bolýdy qalamaımyn", - dedi sóz alǵan №190 páter turǵyny Vıktorıa esimdi azamatsha.
Azamattarǵa adaldyq tanytýdy múdde etetin "Adal Servıstiń" ataýyn antonımdik maǵynaǵa avtomatty túrde ózgertip beretin soraqylyqtardyń sońy emes bul.
"Men de PIK-ti qos qolymdy kóterip qoldaıtyn turǵynmyn. Men myna nárseni aıtqym keledi. "Adal Servıs" JSHS jaldap otyrǵan kúzet agenttigi bizdiń kórshimiz jáne PIK-ke qarsy azamat Shohannyń enshisinde. Qazir bizdiń qaýipsizdigimiz jetkilikti deńgeıde qoldanbaıdy. Aýlaǵa kim kóringen kire beredi. Al seriktestik tarapynan bul máselege eshqandaı shara qoldanylmaı keledi. "Qarǵa qarǵanyń kózin shuqymaıtyny" anyq qoı. Osy sebepti biz PIK quryp, turǵyndar talabyn qanaǵattandyratyn kúzet agenttigin qurýdy kózdeımiz", - deıdi №304 páter turǵyny Azıma esimdi azamatsha.
Qos pikirdegi taraptyń qoldaýshylary bir-birimen qyzylkeńirdek bolyp daýlasyp, ortaq mámilege kele almady.
Jıynǵa kelgender arasynda "Adal Servıs" JSHS ókili de boldy. bir qushaq qaǵazyn qoltyqtap, halyqty taǵy da ózderine ıkemdeýge tyrysqan azamatshany tyńdar qulaq tabylmady.
Shara sońynda kópshiliktiń usynysyna ıelik etip otyrǵan turǵyn Berik Oryntaev kórshilerin sabyrǵa shaqyryp, turǵyn úı keshenindegi olqylyqtardyń ornyn toltyrý barshaǵa ortaq maqsat ekenin jarıa etti.
Múdde ortaq, baǵyt alýan túrli. Bul daýdyń bastalǵanyna birshama ýaqyt boldy. Qashan ortaq sheshim tappaq?!
