QR prezıdentine úmitker Ámirjan Qosanovty "Erkin qazaq" qozǵalysynyń basshysy Erjan Turǵymbaı debatqa shaqyrdy, dep jazady Qamshy.kz aqparat agenttigi. 

Bul týraly ózin "Erkin qazaq" qozǵalysynyń basshysymyn" dep tanystyrǵan Erjan Turǵymbaıdyń ózi 19 mamyrda Facebook paraqshasynda jarálaǵan vıdeosynda aıtty. Erjan Turǵymbaı aldymen ol vıdeony óziniń Iýtýb arnasyna júktegen. Ol atalmysh beıne jazbada Qazaqstanda ótetin saılaý týraly aıta kelip, oǵan qatysyp jatqan jeti kandıdattyń altaýyn "bıliktiń qoldan jasaǵan qýyrshaǵyna" teńegen. 

Sonymen qatar, Erjan Turǵymbaı kandıdattardyń arasynan "Ult taǵdyry" qozǵalysy usynǵan Ámirjan Qosanovqa toqtala kele, ony ashyq pikir almasýǵa shaqyryp otyr. Vıdeoda Qazaqstannyń ýaqytsha prezıdenti Qasym-Jomart Toqaev qazirgi bılik júıesiniń naqty múshesi ekenin aıtyp ótken Erjan Turǵymbaı QR prezıdentine kandıtat Ámirjan Qosanovtan óziniń pozısıasyn aıqyndap berýdi suraǵan.  

Esterińizge sala keteıik, Qazaqstanda 2019 jyldyń 9 maýsymynda kezekten tys prezıdent saılaýy ótpek. Oǵan úmitkerlikke jeti kandıdat tirkelip, qazirgi ýaqytta saılaýaldy úgit-nasıhat jumystaryn júrgizýde. Erjan Turǵymbaı debatqa shaqyrǵan Ámirjan Qosanov buǵan deıin áleýmettik jeli arqyly tikeleı efır jasap, ózine kóp qoıylyp júrgen suraqtarǵa jaýap bergen. Sol kezde ol aldaǵy ýaqytta OSK uıymdastyratyn debatta QR prezıdentine kandıdat alty (ózin qosqanda jeti) úmitkerdiń kez kelgenimen debat jasaýǵa  daıyn ekenin aıtqan bolatyn. 

♦ Oqı otyryńyzdar: https://www.qamshy.kz/article/teledebat-kandydattar-qanday-pikirde.html