Ýkraınanyń jańa saılanǵan prezıdenti Vladımır Zelenskıı ulyqtaý rásiminen keıin eldiń saıasaty men jaǵdaıyn ózgertýge kiristi. Joǵary Radada bergen ýádesinde  Ýkraına saıasatynyń kórinisin kórsetip, óziniń prezıdenttik jumysyn aıqyn bastady.

Sóziniń basynda búkil Ýkraına halqyna sálem joldap, eldiń árbir azamatynyń “prezıdent” ekendigin jetkizdi. Zelenskıı onyń aldynda Ýkraına prezıdenti bolǵan adamdardyń derbestigin synǵa aldy.  Ol bul kúnnen bastap ýkraınalyqtardan ult bolashaǵy men eldiń kórkeıýine jaýapkershilik alýyn surady.

Zelenskııdiń aıtýynsha, onyń prezıdenttik mansabyndaǵy eń basty mindeti – Donbasstaǵy soǵysty toqtatý.

“Menen bir kezde “Donbasstaǵy soǵys toqtatý úshin ne isteý kerek?” dep suraǵan. Birtúrli suraq... al siz, ýkraınalyqtar ózińizge jaqyn adamdardyń ómiri úshin ne isteısiz? Men soǵysty joıý úshin bárine daıynmyn. Men ózimniń ataǵym men dańqymnan bas tartamyn, kerek deseńiz, beıbitshilik ornatý úshin men prezıdenttigimnen bas tartamyn! Bul soǵysty biz bastaǵan joqpyz. Biraq biz bul soǵysty aıaqtaý kerekpiz”, – dedi Vladımır Zelenskıı.

Sonymen qatar, bul shıelenistiń sheshilý jolynda, eń birinshiden, barlyq ýkraınalyq tutqyndardy qaıtarý arqyly kelissózderge jol ashatyn málimdedi.

“Donbass ta, Qyrym da – Ýkraınanyń aımaǵy. Biz olardy qaıtarýymyz kerek. Óıtkeni, bılik olardyń ýkraınalyqtar ekendigin sezdirmedi. Olar bóten emes! Olar ýkraınalyqtar! Ýkraına azamattyǵy tólqujatta emes, Ýkraına júrekte!”, - dedi prezıdent Zelenskıı.

Prezıdent áskerılerge zeınetaqysyn kóterip, aqyly demalys beretinin aıtty. Ol jalǵyz eldiń aýmaǵyn aıtpaı, halyqtyń jaǵdaıyn da oılaý kerektigin eskerdi. Aýrýhanalar, mektep jaǵdaıyn Joǵary Radaǵa tikeleı aıtqan ýaqytta depýtattar kirerge tesik taba almaı, amalsyz otyrdy. Zelenskıı bıliktiń qaı “ǵajap álemde” minsiz joldardy kórip júrgenin surady. Ol buryn akter bolǵan AQSH-tyń eks-prezıdenti Ronald Reıgannyń “Úkimet bizdiń problemany sheshpeıdi. Úkimettiń ózi – bizdiń problemamyz!” sózin basa aıtty.

“Eger de eshteńe sheshe almasańyz, qolyńyzǵa paraq pen qalam alyp, ornyńyzdy bosatyńyz! Ýkraınaǵa shynymen kómektesetin azamattar kerek! Meniń oıymsha, Úkimet otstavkaǵa ketýi qajet. Eshqandaı kabınette meniń sýretim ilinbeýi kerek. Prezıdent – tabynatyn ıkona emes, ıdol emes, prezıdent portret emes! Meniń sýretimniń ornyna ózderińniń balalaryńnyń beınesi tursyn. Sol kezde sheshim jasar aldynda balalaryńnyń kózderine qararsyńdar,” – dedi jańadan saılanǵan prezıdent.

Ol “Qurmetti depýtattar?” dep sózin bastap, depýtattyq derbestikti joıý týraly, zańsyz aqsha jymqyrý týraly zańdy qabyldaý úshin Radaǵa eki aı ýaqyt berdi. Oǵan qosa Zelenskıı Qaýipsizdik qyzmetiniń basshysyn, Ýkraınanyń Bas prokýroryn, Qorǵanys mınıstrin jumystan bosatýdy tapsyrdy. Prezıdent málimdemesinen keıin olardyń ekeýi: Qaýipsizdik qyzmetiniń basshysy Vasılıı Grısak pen Qorǵanys mınıstri Stepan Poltorak otstavkaǵa ketti. Sonymen qatar, Zelenskıı Joǵary Radany taratý týraly buıryq berip, Ýkraınada kezekten tys parlament saılaýy ótetinin jarıalady.

Osyǵan qaraı otyryp, Ýkraına saıasatynyń jańa jolǵa túskenin baıqaımyz. Prezıdent bola salysymen Zelenskıı túgeldeı kóne qurlymdy joıatynyn anyq jetkizdi. Bul tek birinshi kúni, al endi onyń qalaı jalǵasatynyn kóre jatarmyz.

Bizdiń elimizde kezekten tys prezıdent saılaýy 9-maýsym kúni bolady. Qandaı kandıdat bolmasyn, Toqaevtyń jeńetine bári senimdi. Sonymen qatar, opozısıalyq kandıdattarǵa “saılaýshylarmen kezdesýde nemese kópshilik aksıalar kezinde qatysýshylar sany ulttyq qaýipsizdikke baılanysty 100 adamnan aspaýy kerek” degen eskertý bar. Buǵan ne aıtýǵa bolady? Demokratıa!

Negizgi taqyrypqa keletin bolsaq, Toqaev naýryz aıynda bolǵan ulyqtaý rásiminde ne aıtty? Qazaqstanǵa qandaı ózgeris ákeletinin jetkizdi? Elbasymyzdy maqtaýdan ári aspady. Sóz joq! Nursultan Nazarbaevtyń elimizge bergeni kóp. Biraq ta "prezıdentimizdiń alǵa qoıǵan maqsaty qandaı?" degen suraq týyndaıdy.

Qazaqstannyń taptaýryn bolǵan 30 jyldyq jetistikterin aıtqannan ne ózgeredi? Bizdiń elimizde áli sheshilmegen jaǵdaılar kóp. Jemqorlyqtan bastap, qarapaıym adam qaýipsizdigimen aıaqtalady. Adamdar beıbit sherý ótkizý úshin  ákimshilikten ruqsat alýy kerek. Biraq ta ártúrli jaǵdaılardy eskerip, sońynda eshqandaı nátıje shyqpaıdy. "Zańsyz mıtıń jasadyńdar" dep jergilikti bılik polısıa men arnaıy jasaqtardy óz halqyna qarsy jiberedi. Mundaı bassyzdyqtar qashan doǵarylady? Qorytyndylaı kele, Toqaev ashyq aspan men soǵyssyz ómirdi qamtamasyz etýden bólek, jalpy halyq jaǵdaıyn keleshekte kóteredi me? Ony biz tek ýaqyt óte ǵana bilemiz...