"Anaǵa aparar jol"fılmi 24-shi mamyrdan bastap AQSH-ta kınoprokatqa shyǵady dep habarlaıdy Qamshy.kz aqparat agenttigi "Qazaqfılm" baspasóz qyzmetiniń málimetterine súıenip. 

Mádenıet jáne sport mınıstrligi tapsyrysy boıynsha Sh.Aımanov atyndaǵy "Qazaqfılm" AQ "Novyı mır" jáne Sataifilm kompanıalarymen  birlese túsirgen "Anaǵa aparar jol" fılmi Los-Andjeles (Kalıfornıa shtaty), Hartford (Konnektıkýt shtaty), Húston (Tehas shtaty) jáne Neshvıll (Tennessı shtaty) qalalaryndaǵy kınoteatrlarda kórsetiledi.

Odan bólek, amerıkalyq prokattan keıin (90  kún ótken soń) bul fılmdi Netflix kompanıasynyń strımıng-platformasy (aǵymdaǵy onlaın kórsetilim) jáne VOD (suratý boıynsha fılmdi kórý) sandyq taralymy arqyly tamashalaýǵa bolady.

Esterińizge sala ketsek, "Anaǵa aparar jol" fılmi Qazaqstan atynan "Oskar" jáne "Altyn globýsqa" "Úzdik shetel fılmi" atalymynda usynylǵan bolatyn. 

"Anaǵa aparar jol" fılminiń AQSH-taǵy dıstrıbúsıasyn amerıkalyq World Wide Motion Pictures Corporation kompanıasy qolǵa alǵan. 1977 jyly negizi qalanǵan bul kompanıa kórkem,  derekti, qysqametrajdy fılmderdi jáne televızıalyq jobalardy qarjylandyryp qana qoımaı, olardy óndiriske jiberip, tipti prokatqa shyǵýǵa kómektesedi. Kompanıanyń ár jyldardaǵy top-menedjerleri kóptegen kıno jáne televızıalyq jobalarǵa, "Oskar" jáne "Emmı" premıalaryn jáne basqa da bedeldi júldederdi jeńip alǵan jobalarǵa keńes berip, olarǵa prodúserlik qyzmet kórsetken.

Usynǵan: Marjan Sábet