SHQO-da taǵy bir qus fabrıkasy salynýy múmkin dep habarlaıdy Qamshy.kz aqparat agenttigi Altaınús tilshisine silteme jasap.
Bul týraly oblysqa resmı saparmen kelgen Shyńjan Uıǵyr avtonomıasy, Halyq úkimeti tóraǵasynyń orynbasary Chjao Chýnszúmen kezdesýde aımaq basshysy Danıal Ahmetov málim etti.
Aıta keteıik, Shyǵys Qazaqstanǵa sapary barysynda Chýnszú myrza bastaǵan qytaılyq delegasıa D.Serikbaev atyndaǵy SHQMTÝ-da, sonymen qatar Úlbi metalýrgıalyq zaýytynda bolyp, ondaǵy jumyspen tanysyp qaıtqan. Sheteldik qonaqtar oblysqa saparynyń basty maqsaty birqatar saladaǵy birlesken jobalardy júzege asyrý jaǵyn talqylaý bolǵanyn aıtty. Ásirese aýyl sharýashylyǵy salasy qyzyqtyratynyn jasyrmady. Aımaq basshysy Danıal Ahmetov te Shyǵys Qazaqstan oblysy úshin bul agrosektordegi áriptestik asa mańyzdy ekenin jetkizip, qonaqtar nazaryna birneshe jobany usyndy.
–Oblysymyzda jańa qus fabrıkasyn salýdy josparlaýdamyz. Bul – aýqymdy joba. Atalmysh maqsatqa 40 myń gektar jer bólemiz. Taǵy 300 gektarǵa jýyq telimde fabrıkanyń negizgi bazasy ornalasatyn bolady. Jospar boıynsha kásiporyn jylyna 30 myń tonna qus etin óndirýi tıis. Mine, osy bir jobany júzege asyrýǵa sizder de atsalyssańyzdar degen tilegimiz bar. Jalpy, bizdiń oblysta aýyl sharýashylyǵy salasynda jemisti eńbek etip jatqan birneshe birlesken qazaq-qytaı kásiporyny bar. Máselen, Kókpekti aýdanynda qurylǵan dál osyndaı kompanıanyń biri búginde Qytaı eline balyq ónimderin eksporttaýmen aınalysýda. Sol sıaqty Besqaraǵaı, Úrjar aýdandarynda da birlesken kásiporyndarymyz nátıjeli jumys júrgizýde. Biz, sonymen qatar Qytaıǵa et ónimderin eksporttaýǵa múddelimiz. Buǵan áleýetimiz de, múmkindigimiz de jetedi, – degen oblys ákimi Úrimji men Sháýeshek qalalary aralyǵynda salynǵan jańa temirjol eki el aımaq arasyndaǵy baılanysty budan saıyn bekite túsetinine senim bildirgen.
Óz kezeginde sheteldik delegasıany bastap kelgen Chjao Chýnszú myrza aımaq basshysyna shaqyrtýy úshin alǵys aıtyp, Shyńjan Uıǵyr avtonomıasy úshin Shyǵys Qazaqstan oblysy negizgi strategıalyq áriptesterdiń biri ekenin jetkizgen.
–Biz de áriptestigimiz baıandy bolǵanyn qalaımyz. Jáne osy baǵytta jumys júrgizýge ázirmiz. Búginde Shyǵys Qazaqstanda eki óńirdiń kásipkerleri qurǵan 12 birlesken kompanıa bar eken. Sizderdiń oblystaryńyzda óndiriletin aýylsharýashylyq ónimderi joǵary sapaǵa ıe ekenin de bilemin. Ásirese, bıdaı, un men maıly daqyldaryńyzdy maqtaıdy. Biz Shyǵys Qazaqstan oblysynan osy sıaqty ónimderdi kóbirek alǵymyz keledi. Týrızm salasyn da damytýǵa nıettimiz. Ótken jyldyń qarasha aıynda Úrimji qalasynda kezdesip, ekijaqty kelissózder júrgizgen bolatynbyz. Endi sol basqosýda qol jetkizgen ýaǵdalastyqtarymyzdy is júzinde oryndaýǵa daıarmyz, – dedi Chjao Chýnszú myrza.
Kezdesý barasynda eki óńirdiń bilim, ǵylym, densaýlyq saqtaý jáne mádenıet salalaryndaǵy áriptestigi de sóz boldy. Kelissózder qorytyndysy boıynsha taraptar birqatar ekijaqty hattamaǵa qol qoıdy.
