"Aq jol" partıasynyń tóraǵasy, Májilis depýtaty Azat Perýashev Nur-Sultan qalasy ákimdiginiń "Aq jol" partıasynyń saıası qýǵyn-súrgin qurbandaryn eske alý úshin "Alashqa taǵzym" atty sherýin ótkizýge ruqsat bermeýine qatysty málimdeme jasady dep habarlaıdy Qamshy.kz aqparat agenttigi.
Azat Perýashevtiń málimdemesin oqyrman nazaryna eshbir alyp-qospasyz usynamyz:
Qurmetti qazaqstandyqtar!
Jýyrda Nur-Sultan qalasynyń ákimdigi, "Aq jol" partıasynyń saıası qýǵyn-súrgin qurbandaryn eske alý úshin "Alashqa taǵzym" atty sherýin ótkizýge ruqsat bermedi.
Ruqsat bermeýge negiz bolǵan sebepteri – qyp-qyzyl ótirik. Bizdiń ótinishimizde barlyq qajetti aqparat zańǵa sáıkes kórsetilgen bolatyn. Memlekettik organdardy da túsinýge bolady: olar saılaý kezinde túrli arandatýlar men bassyzdyqtardan qaýiptenip otyrǵan shyǵar.
Sondyqtan mynany aıtqym keledi: eshkim otqa maı quıyp, kópshilikti ashyndyrýǵa múddeli emes. Memlekettik ınstıtýttardy álsiretý – azamattardyń ózderi úshin de, memleket úshin de qaýipti. Ulttyq táýelsizdigimiz ben jerimizdiń tutastyǵyn saqtaý úshin myqty memleket kerek.
Sonymen qatar, ol jaı kúshti ǵana emes, árkim, óziniń múmkindikteri men quqyqtaryn júzege asyra alatyn, ádiletti de, ozyq memleket bolýy qajet. Onyń ishinde sóz bostandyǵyna degen azamattardyń haqy da bar.
Memlekettik organdar, adamdardy alańǵa shyǵaratyn yza men kek emes, jaqsylyqqa degen umtylysy ekenin túsingeni jón. Narazylyqtyń aldyn alýdyń eń tıimdi joly – belsendilerdi qamaý emes, naqty reformalardy tezdetý.
Joǵaryda aıtylǵandarǵa baılanysty, men: "Alashqa taǵzym" sherýine ruqsat bermese de, "Aq jol" partıasynyń jetekshileri men depýtattary 31-mamyr kúni "Alash" qaıratkerleri men qýǵyn-súrginge ushyraǵan ata-babalarynyń portretterimen olardyń eskertkishine baryp, gúl qoıyp, quran baǵyshtaıtynyn jarıalaımyn.
Bul sherý de, mıtıń te emes. Sondyqtan biz osy joly eshkimnen ruqsat suramaımyz. Bizdiń Qazaq Respýblıkasynyń bolashaǵy úshin qurban bolǵandarǵa taǵzym etýge tolyq konstıtýsıalyq haqymyz bar.
Azat Perýashev,
"Aq jol" partıasynyń tóraǵasy
Usynǵan: Ádilet Mádenıet
