23 mamyrda Nur-Sultan qalasynda tótenshe jaǵdaı oryn alyp, "Astana sý arnasy" komýnaldyq kásipornynyń 4 qyzmetkeri qaza tapty dep jazady Qamshy.kz aqparat agenttigi.
Bul týraly qala ákimi Baqyt Sultanov Facebook paraqshasynda jazdy.
"Búgin Nur-Sultanda qaıǵyly oqıǵa boldy. Oqıǵa saldarynan «Astana sý arnasy» komýnaldyq kásipornynyń 4 qyzmetkeri qaza boldy. Ózimniń jáne ákimdiktiń atynan qaza tapqandardyń otbasylary men dostaryna kóńil aıtamyn. Qala ákimdigi barlyq marqumdardyń otbasylaryna qajetti qoldaý kórsetetin bolady. Men tıisti organdarǵa muqıat tergeý júrgizýdi jáne osy qaıǵyly oqıǵalardyń sebepterin anyqtaýdy tapsyrdym", – dedi qala ákimi.
İshki ister mınıstrliginiń Tótenshe jaǵdaılar jónindegi komıtetiniń tóraǵasy Vladımır Bekkerdiń tengrinews.kz saıtynyń tilshisine aıtýy boıynsha, apatty jaǵdaı Momyshuly dańǵylynyń boıynda oryn alǵan. Tórt jumysshysy metan gazyna ýlanyp qaıtys bolǵan.
"Búgin 16.24-te Tótenshe jaǵdaılar qyzmetiniń 112 nomerine Momyshuly dańǵylyndaǵy qudyqqa adam qulap túskeni týraly habar tústi. Al 16.46-da tótenshe jaǵdaılar qyzmetkerleri kelgende qudyq ishinde bir emes, tórt adamnyń qaıtys bolǵany anyqtady", - dedi Vladımır Bekker.
Oqıǵa orynynda bolǵan órt sóndirýshilerdiń túsindirýinshe, qudyq ishinde dımetri 3,5 metr, tereńdigi 10 metrlik bak bolǵan. Ol bak úsh metrge deıin metan suıyqtyǵymen toltyrylǵan. Qazaq tapqandardyń denesi sol suıyqtyqtyń ishinen tabylypty.
"Búgin "Astana Sý arnasy" brıgadasy káriz sorǵalaý stansıalaryna bólshekteý jumystaryn júrgizgeni anyqtaldy. Jumysshylardyń biri aýyryp, esinen tanyp, qudyqqa qulap túsken. Ekinshi áriptesi oǵan kómektesýge tyrysyp, tehnıkalyq satyǵa túsip ol da esinen tanyp qalǵan. Olardan keıin taǵy eki jumysshy qutqarýǵa túsip, shyqpaı qalǵan. Jalpy jumys brıgadasynda 6 adam bolǵan. Olardyń tórteýi qaıtys boldy. Qudyqtyń syrtynda qalǵan ekeýi (biri- santehnık, ekinshisi - júrgizýshi) 103-ke habarlasqan", - dedi Bekker.
Aman qalǵan eki jumysshynyń biri zardap shekken. Nur-Sultan qalasy ákimniń baspasóz hatshysy Elvıra Júrgenbaevanyń aıtýynsha, zardap shekken jumysshy aýrýhanada jatyr.
"Qaza tapqandar 1988, 1993, 1995 jáne 1967 jyly týǵan. Kúni boıy jumys istegen. Barlyǵynda respırator bolǵan. Biraq qudyqtan denelerdi shyǵarǵanda respırator bolmady. Jumys aıaqtalǵan kezde ony sheship tastaǵan sıaqty. Eger respırator bolǵanda aman qalar edi", - dedi tótenshe jaǵdaılar komıtetiniń basshysy Vladımır Bekker.
Daıyndaǵan: Mıat Káshibaı
