Belgili jýrnalıs Rysbek Sársenbaıuly alda kele jatqan kezekten tys prezıdent saılaýyn Qazaqstanda monarhıalyq bılik ornatýdaǵy áreketterdiń biri sanaıdy dep jazady Qamshy.kz aqparat agenttigi. 

Bul týraly Rysbek Sársenbaıuly ózi jarıalaǵan vıdeo úndeý barysynda aıtty. Onyń pikirinshe, saılaýǵa Toqaevty qatystyrý – senarıdiń alǵashqy qadamy. Sársenbaıuly odan keıin bılik monarhıalyq júıemen tapsyrylady dep esepteıdi.

Rysbek Sársenbaıdyń aıtýynsha, boıkot – halyq úshin qazirgi jaǵdaıda eń tıimdi nárse.

"Biz prezıdenttik saılaýǵa boıkot jarálaý arqyly bılikke talap qoıamyz. Zańdardy ózgertýdi, zańdardaǵy azamattyq quqyqty shekteıtin baptardy alyp tastaýdy talap etemiz. Prezıdenttik, parlamenttik, tipti, máslıhat saılaýy bolsyn, qandaı saılaý ótkizse de, halyqty qatystyrý kerek degen talap qoıamyz. Sonda ǵana halyq memlekettik bıliktiń qaınar kózi bolady", – degen Sársenbaıuly  halyqty 1 maýsym kúni Nur-Sultan qalasynda ótetin Halyq quryltaıyna qatysýǵa shaqyryp otyr.

"1 maýsym Astana qalasynda (biz ony Nur-Sultan dep ataýǵa qarsymyz) halyq óziniń quryltaı -jıynyn ótkizedi. Bul kúni eldegi qazirgi jaǵdaıdy talqyǵa salady. Eldiń erteńgi jaǵdaıy qandaı bolmaq, bıliktiń ustanyp otyrǵan saıasaty qanshalyqty durys, soǵan taldaý jasalynady jáne ádiletti baǵa beriledi", – dedi Rysbek Sársenbaıuly. 

Sonymen qatar ol vıdeo úndeýinde alda kele jatqan saılaýda "Ult taǵdyry" qozǵalysy usynǵan kandıdat Ámirjan Qosanov týraly da óz oıyn bildirdi. Rysbek Sársenbaıdyń oıynsha, Qosanov saılaýǵa túsý arqyly halyqty bılikke jyǵyp berip otyr. 

"Eger Qosanov "men qalaıda jeńiske jetem, maǵan daýys bergen halyq jeńiske jetedi jáne biz sol jeńisimizdi qorǵaı alamyz, daýysty urlaǵan jaǵdaıda urylardy qolynan ustap urlyǵyn betine basamyz, bılik saılaýdy burmalaǵan jaǵdaıda qaıtadan ony túzettirýdi talap etip, biz jeńiske jete alamyz" dep aıta alatyn bolsa, biz de ony qoldar edik. Ókinishke qaraı biz onyń syryn bilgendikten hám onyń qandaı is-áreketke bara alatynyn baǵamdaǵandyqtan da biz ony qoldaı almaı otyrmyz", - dedi Rysbek Sársenbaıuly.

Vıdeo Youtube-tan alyndy

Daıyndaǵan: Mıat Káshibaı