Belgili kásipker Ahmetbek Nursılanyń anasy kelmes saparǵa attandy dep habarlaıdy Qamshy.kz aqparat agenttigi.

Ahmetbek Nursıla — kásipker, alǵashqy qazaqtildi bıznes-trenerlerdiń biri. «Shvabskıe kolbaskı” shujyq kombınatynyń ıesi. “Asyl aǵash” (“Heaven House`) saýda markasymen Pavlodardaǵy jıhaz fabrıkasyn bankrot bolyp jatqan jerinen kótergen bıznesmen. 2001 jyly Qazaqstan Prezıdenti janyndaǵy Kásipkerlerler keńesiniń múshesi bolǵan. “Sarjaılaý” qymyz shubat óndirisi kompanıasynyń ıesi jáne bas dırektory. Semeı-teri ton tigý kombınatynyń negizin qalaýshy. Úrjar et kombınatyn bankrottyqtan kóterdi. «Pestısıdy» JSHS tyńaıtqyshtar satatyn kompanıanyń aksıoneri.

Birneshe bıznes-jobanyń negizin qalap, júzege asyrǵan qazaq kásipkeri Ahmetbek Nursıla — sońǵy jyldary ınternet-aýdıtorıa, ásirese, Facebook qoldanýshylary úshin jaqsy tanys tulǵa. Qazir "Bıznes Bastaý"  atty jas kásipkerlik mektebiniń ıesi.  

"Meniń Anam - balasy jaqsy analar, eshqashan qartaımaıdy!

Meniń anam Bıbatı—ómirge 15 bala ákelgen BATYR ANA! Ol balalardy attyń jaly, túıeniń qomynda júrip tapty dese bolady. Ákeı marqum bir anadan jalǵyz edi, anam qandaı jaǵdaıda bolmasyn seriktesi boldy, ómirdiń barlyq ystyq-sýyǵynda qasynda boldy. Jas kezderinde Qytaıda turǵanda ákeı qyzmetker boldy, anamyz qasyna erip, Sarysúmbede boldy. Elge kelgen soń ákeı malshy bolýǵa májbúr boldy, anamyz balalaryn arqalap, jetelep júrip tamaǵyn pisirip, kıimin jýyp qasynda boldy. 

«Anasy bar adamdar eshqashan qartaımaıdy» degen óleńdi, sheshem keıde «Balasy jaqsy analar, eshqashan qartaımaıdy» dep ózgertip aıtyp otyrady. Ómirde ne istesek te, analarymyzdy qýantyp júreıik, odan artyq qýanysh joq bolar sanaly adam balasyna!" dep jazǵan edi Ahmetbek Nursıla anasy týraly.

Qamshy.kz aqparat agenttigi Ahmetbek Nursılanyń anasynyń qazasyna qaıǵyra otyryp, kóńil aıtady.