Búgin, ıaǵnı, 5 maýsym kúni Almatyda tanymal jýrnalıs, qoǵam belsendisi Sáýle Ábildahanqyzyna qastandyq jasaldy. Naqtyraq aıtsaq, aı men kúnniń amanynda Almatydaǵy quzyrly organdardyń biri sanalatyn - Naýryzbaı aýdandyq İİB ǵımaraty mańynda belgisiz bir top áıel İİB-nan shyqqan jýrnalısi aıaýsyz soqqynyń astyna alǵan. Ábildahanqyzynyń aıtýynsha, denesinen uryp, shashynan julǵan. Ol aýyr soqqynyń saldarynan Almatydaǵy  №7 aýrýhanaǵa jetkizildi.

Bir kúnde tórt shaqyrtý

Áńgimeni áriden tarqatsaq. Kúni keshe, ıaǵnı, 4 maýsymda Sáýle Ábildahanqyzy Facebook paraqshasynda úıine bir kúnde tórt ret polısıa qyzmetkerleri kelgenin jáne ústinen ózine tanys emes adamdardan birneshe aryz túskenin jazǵan.  Polısıa qyzmetkerleri kelgen sátti tikeleı efırge túsirip, jeli qoldanýshylarymen bólisken ol óziniń ústinen birneshe aryzdyń túsýin qoǵamdaǵy belsendiligimen hám saıası kózqarasymen baılanystyrdy.

Bul iske polıseılerdiń qandaı qatysy bar?

Al 5 maýsymda belsendini Naýryzbaı aýdandyq ishki ister bóliminiń qyzmetkerleri erteńgi saǵat 10-dar shamasynda úıinen áketip, atalǵan aýdannyń ishki ister bólimine jetkizgen. Ol jerde Uljalǵas Satqynbaeva esimdi azamatshanyń aryzy boıynsha Sáýle Ábildahanqyzyn úsh saǵat boıy tergep, úıine bosatady. Biraq, biraq...

Ábildahanqyzyn qoldaýǵa barǵan kóp balaly analardyń biri: "Mine, osy jerden poleıseılerdiń "quıtyrqy" áreketteri bastaldy. Quzyrly organda qyzmet qylyp júrgen "pogondy kisilerdi" kinálaýdan aýlaqpyn. Deıturǵanmen, istegen isterine qaraǵanda, arttary taza emes-aý, bulardyń! Birinshiden, Sáýleni polıseıler alǵashqy kirgen esikten emes, bólimsheniń basqa esiginen syrtqa shyǵarǵan. Nege? Sebebi kirgizgen esiktiń aldynda biz (kóp balaly analar, BAQ ókilderi jáne taǵy da basqa qoldaýǵa kelgen adamdar) kútip turdyq. Ekinshiden, bizge Naýryzbaı poleıseıleri "Almaly aýdandyq İİB-na baryńyzdar, Sáýle Ábildahanqyzyn sol jaqqa alyp ketti" degen jalǵan aqparat berdi", - deıdi.

Polıseılerdiń "kúdikti áreketi" bul ǵana emes. Máselen, Ábildahanqyzynyń aıtýyna qaraǵanda, polıseler bólimshe esiginen shyǵarǵan soń ózi múldem tanymaıtyn birneshe áıel  "biz seni qoldaýǵa keldik" dep jaqyndaı bergende,  jabylyp soqqyǵa jyqqan. Al Ábildahanqyzyna  bólimshege shaqyrtý alyp kelgen polıseılerdiń qasynda bolǵan "qara kıim, qara betperdeli er azamat" bul jaǵdaıdy bastan-aıaq vıdeoǵa túsirip turǵan.

Sonda quzyrly organ ókilderniń qasynda júrgen bul beıtanys kisi kim? Polıseı me? Eger solaı bolsa, almatylyq polııseıler qashannan beri tóbelesti baqylap turatyn bolǵan? Qazaqstannyń bas polıseıi Erlan Turǵynbaev myrza da, onyń ókilderi de bul suraqtarǵa áli jaýap bere qoımady. Dese de, jýrnalısi soqqynyń astyna alyp, jazyqsyzdan jazyqsyz japa shektirgen bul iske QR İİM jýyq arada jaýap beredi degen oıdamyz. 

Sáýle Ábildahanqyzy túsken №7 aýrýhananyń bas dárigeri Qýanysh Janbolat Azattyq Radıosynyń tilshisine Ábildahanqyzynyń denesinde tyrnalǵan jerler baryn aıtypty.

"Qoldary, denesi tyrnalǵan. Onyń bárin jazyp beremiz. Basyn rentgenge, ish-qurylysyn ÝZI-ge túsirdik. Synǵan jeri joq, ishki aǵzalary aman. Hırýrg, travmatolog, neırohırýrg dárigerler qarady. Qolyna qaǵazdaryn berip, qandaı dári ishý keregin aıtyp, úıine qaıtardyq", - dedi dáriger.

Jýrnalıs Sáýle Ábildahanqyzy sońǵy kezderi qoǵamda belsendiligimen tanyldy. Máselen ol 2018 jyly Qytaı Qazaq shekarasynan zańsyz ótken etnıkalyq qazaq Saıragúl Saýytbaıdyń isine advokat Abzal Quspanmen birge belsene aralasqan. Al aǵymdaǵy jyldyń aqpan aıynan bastap kóp balaly analardyń sózin sóılep, olardyń áleýmettik máselesi sheshilý úshin birneshe márte ákimdikke talaptaryn qoıǵan. 

Aıta keteıik, bul jyl basynan beri Qazaqstanda qoǵam belsendilerine jasalǵan birinshi qastandyq emes. Jýyrda ǵana Qaraǵandy oblysynyń Jańaarqa aýdanynda qoǵam belsendisi Ǵaly Baqtybaevty áıeliniń kózinshe atyp óltirgen. Qylmyskerler áli ustalǵan joq.