Senat otyrysynda memlekettik sharalardy ótkizýge jumsalyp jatqan qarajat kólemi sóz bolyp, jaýapty basshylardan esep suraldy dep habarlaıdy Qamshy.kz aqparat agenttigi Tengrinews.kz saıtyna silteme jasap.

"Esep komıtetiniń málimetinshe, 2016 jyl men 2018 jyl aralyǵynda konferensıalar men kórmeler ótkizýge jumsalatyn qarajat mólsheri 4 paıyzdan 80 paıyzǵa deıin ósken. EXPO-ny qospaǵanda osy baǵytta jumsalǵan qarajattyń jalpy mólsheri 825 mıllıon teńgeni quraıdy. Onyń ishindegi 664 mıllıon teńgesi 2018 jyly shyǵyndalǵan. Bul kórsetkishterdiń barlyǵy memleket basshysynyń barynsha el búdjetin únemdeý týraly buıryǵynan keıingi kórsetkishter", - dedi senator Olga Perepechına Senat otyrysynda.

Onyń aıtýynsha, atalǵan nárselerge Mádenıet jáne sport mııstrligi, SİM, Aqparat jáne qoǵamdyq damý mınıstrligi basa nazar salýy kerek.

Atalǵan máselelerge qatysty birinshi vıse-mınıstr Berik Sholpanqulov jaýap berdi. Onyń sózine sensek, qazirgi ýaqytta arnaıy jumys toby qurylyp, atalmysh sharalarǵa ústimizdegi jyly qansha óarjy shyǵyndalǵanyn anyqtaıtyn revızıa jasaqtap jatyr. Arnaıy topty premer-mınıstrdiń birinshi orynbasary, qarjy mınıstri Álıhan Smaılov basqarady.

"Aldaǵy úsh jyldyqta júzege asatyn sharalarǵa qarastyrylatyn qarajat kólemin baǵamdaýdamyz. Bul jumys qazirgi ýaqytta óte qarqyndy júrip jatyr. Jaqyn arada naqty sheshim shyǵaramyz", - dedi Sholpanqulov.

Senat spıkeri Darıǵa Nazarbaeva Berik Sholpanqulovtan naqty sandardy ataýyn surap shúılige tústi.

"Darıǵa Nursultanqyzy, 10-maýsymǵa deıin árbir memlekettik mekeme ózderiniń jeke málimetin jiberýi tıis. Shilde aıynyń ortasyna deıin komısıa konferensıalar men kórmeler týraly qorytyndy shyǵaryp, qoldanylatyn sharalardy ataıdy", - dedi suraqqa súrine qoımaǵan Sholpanqulov.