Qasym-Jomart Toqaev Exit Poll nátıjeleri jarıalanǵannan keıin alǵashqy málimdemesin jasady dep habarlaıdy Qamshy.kz aqparat agenttigi. Bul týraly málimet «Nur Otan» partıasynyń resmı saıtynda jarıalandy.

Saýalnama nátıjesinde Qasym-Jomart Toqaev saılaýshylardyń 70,13 paıyz daýsyn jınady. Halyqtyń saılaýǵa kelý kórsetkishi 77,4 paıyzdy qurap, 9 mıllıonnan astam qazaqstandyq óz tańdaýyn jasady.

Aldyn ala málimetter jarıalanǵannan keıin Qasym-Jomart Toqaev ózine senim bildirgen barsha otandastaryna alǵysyn bildirdi.

"Saılaýaldy naýqan órkenıetti ári júıeli túrde júrgizildi. Shyn máninde bul naýqan baǵdarlamalardyń básekesi boldy. Halyq bizge senim artyp, óz tańdaýyn jasady. Sondyqtan aldymyzda aýqymdy jumystar kútip tur", – dedi Qasym-Jomart Toqaev.

Ol úgit-nasıhat kezeńine qatysqan respýblıkalyq qoǵamdyq shtabtyń múshelerine, barlyq belsendi azamattarǵa jáne partıa jaqtastaryna atqarǵan jumystary úshin alǵysyn bildirip, elektoraldy naýqannyń aýqymy men tehnologıalyq múmkindigin atap ótti.

"Búkil álemdegi sıaqty bizdiń elimizde de jaǵdaıdyń ózgergenin kórip otyrsyzdar. Álemdik qaýymdastyqtyń bir bólshegi bolǵandyqtan Qazaqstanǵa jahandyq oqıǵalardyń da yqpaly bolary sózsiz. Sondyqtan biz elimizdiń jarqyn bolashaǵy úshin judyryqtaı jumylýymyz kerek", – dedi Q.Toqaev.