Búgin Parlament Májilisiniń jalpy otyrysynda depýtat Anar Jaıylǵanovanyń ókilettigi merziminen buryn toqtatyldy, dep habarlaıdy Qamshy.kz aqparat agenttigi QazAqparat saıtyna silteme bere otyryp.

Eske sala keteıik, jaqynda ǵana Anar Jaıylǵanova Qazaqstan Respýblıkasy Memlekettik qyzmet isteri agenttiginiń tóraǵasy bolyp taǵaıyndalǵan edi.

«Sizge Parlamentte birlesip atqarǵan jumysyńyz úshin barlyq depýtattardyń atynan alǵysymyzdy bildiremiz. Barsha áriptesterińiz sizdi bilikti zańger, tájirıbesi joǵary maman retinde jaqsy biledi. Májiliste osy Zańnama jáne sot-quqyqtyq reforma komıtetiniń múshesi boldyńyz. Endi jaqynda Memlekettik qyzmet isteri agenttiginiń tóraǵasy bolyp taǵaıyndaldyńyz. Óte laýazymdy qyzmet. Sondyqtan barsha depýtattardyń atynan osy jańa jumysta úlken tabys tileımiz», - dedi Parlament Májilisiniń tóraǵasy Nurlan Nyǵmatýlın.

Jalpy otyrys barysynda Anar Nuralyqyzyna arnaıy «Alǵys hat» tapsyryldy.

Anar Jaıylǵanova 1969 jyly 10 shildede Shyǵys Qazaqstan oblysy Shar aýdany Belterek aýylynda týǵan. 1986 jyly Belterek aýylynyń orta mektebin támámdap, osy jyly S.M. Kırov atyndaǵy Qazaq memlekettik ýnıversıtetiniń zań fakúltetine túsip, 1991 jyly ony úzdik aıaqtady. 1999 jylǵy jeltoqsanda Qazaqstan Respýblıkasy Prezıdenti Ákimshiliginiń memlekettik-quqyqtyq bóliminiń aǵa sarapshysy laýazymyna aýysty.

2000 jylǵy qyrkúıekte Qazaqstan Respýblıkasy Joǵarǵy Soty tóraǵasynyń keńesshisi, 2004 jylǵy jeltoqsanda Qazaqstan Respýblıkasy Joǵarǵy Sotynyń sýdıasy bolyp qyzmet atqardy. 2008 jyly 13 naýryzda Qazaqstan Respýblıkasy Parlament Senatynyń Qaýlysymen Qazaqstan Respýblıkasy Konstıtýsıalyq Keńesiniń múshesi bolyp taǵaıyndaldy.