Qasym-Jomart Toqaev Saýda jáne ıntegrasıa mınıstri Baqyt Sultanovty qabyldady dep habarlaıdy Qamshy.kz aqparat agenttigi Aqordaǵa silteme jasap. 

Memleket basshysyna jańadan qurylǵan mınıstrliktiń júrgizip jatqan jumystary, shtat quramynyń jasaqtalýy jáne tıisti normatıvtik-quqyqtyq baza daıyndaý jóninde málimet berildi. 

Qazaqstan Prezıdenti mınıstrge birqatar mindet júktedi. 

– Ulttyq múddelerdi qorǵaý úshin ortalyq jáne jergilikti atqarýshy organdardy úılestirýge jáne Eýrazıalyq ekonomıkalyq odaq, QHR jáne Ortalyq Azıa naryǵyndaǵy taýarlarymyzdy ilgeriletýge kúsh salý qajet. Eksportqa shyǵarýshylardy qoldaý úshin olarǵa kórsetiletin qyzmet túrlerin «bir tereze» qaǵıdaty boıynsha jumyldyrý kerek. İshki naryqty qorǵaý jáne ony sapaly ári qoljetimdi taýarlarmen toltyrý máseleleri halyqtyń áleýmettik-ekonomıkalyq jaǵdaıymen jáne el ekonomıkasynyń damýyna tikeleı baılanysty. Sondyqtan, zamanaýı formattaǵy naryqty damytý jáne aqshasyz tólem mehanızmin keńeıtý máseleleri boıynsha jergilikti atqarý organdarymen ózara is-qımyldar júrgizý mańyzdy, – dedi Qasym-Jomart Toqaev.