Saǵat 10.00-de bastalyp eki saǵat bolǵan mıtıńke bılik ruqsat bergen. Oǵan shamamen 200-den asa adam jınaldy. 

Jınalǵan jurtshylyq aldynda sóz sóılegen belsendiler "beıbit mıtıń úshin bılikten ruqsat suramaý kerek jáne ony belgili bir orynda ǵana ótkizý halyqtyń zańdyq quqyǵyn shekteý" degendi aıtty. 

Alǵashqylardyń biri bolyp sóz sóılegen qoǵam qaıratkeri Rysbek Sársenbaıuly halyqtyń óz quqyǵyn talap etýdi úırenýi qajet ekenin aıtty. Ol Qazaqstannyń eks-prezıdenti Nursultan Nazarbaevqa:

"Aqsaqal, 30 jyl boıy halyq moınyna minip keldińiz. Endi halyq moınynan túsińiz, bılikten tolyq ketińiz. Ózińizben birge bılik qolshoqpary bolǵan İshki ister mınıstri, ózge de sheneýnikterdi alyp ketińiz",- dedi.

Rysbek Sársenbaıulynan basqa sóılegen belsendiler de "Nazarbaevtyń bılikten birjolata ketýin" talap etti. 

Olar eks-prezıdenttiń "bılikke jarmaspaı", qazirgi prezıdent Qasym-Jomart Toqaevqa eldi basqarýǵa kedergi keltirmesin" degen talap qoıdy. 

Al mıtıńti uıymdastyrýshylardiń biri Álnur Iláshev qatysýshylardan "mıtıń ótkizýge ruqsat qajet emes" degen taqyrypta ǵana sóıleýin ótindi.  

Mıtıńke eki saǵat ýaqyt qana berilgen. Sondyqtan qatysýshylar bir-birine oıyn qysqa da nusqa jetkizýdi, bir-birin qaıtalamaýǵa shaqyrdy.

"Aqıqat" JSDP-nyń jetekshisi Ermurat Bápı "bılik belsendilerge mıtıń ótkizýge ruqsat berse de, basqalardyń quqyǵyn shektep otyrǵanyn" aıtty.

–Bılik myna jerde bizge mıtıń ótkizýge ruqsat berdi, biraq "Saryarqa" bazarynda saýda jasaıtyndardyń quqyǵyn shektedi. Olarǵa búgin bazarda saýda jasaýlaryna tyıym salynǵan.  Bul – halyqtyń quqyǵyna qol salý", - dedi Ermurat Bápı. 

Sonymen qatar, qatysýshylardyń barlyǵy bılikten Aron Atabek, Maks Boqaev, Muhtar Jákishev jáne taǵy da basqa "saıası tutqyndardy" bosatýdy talap etti.