Shyǵys Qazaqstan oblysynyń Kúrshim aýdanynda kózi tirisinde «Tamashanyń tarlany» atanǵan talantty óner ıesi Ýáıis Sultanǵazınge eskertkish taqta ornatyldy dep habarlaıdy Qamshy.kz aqparat agenttigi.   

Budan bes jyl buryn Kúrshim aýylyndaǵy Pavlodar dep atalǵan kóshege jergilikti turǵyndardyń usynys-tilegimen osy óńirde týyp-ósken, elimizge tanymal ártis bolǵan Ýáıis Sultanǵazınniń esimi berilgen edi. Endi mine araǵa biraz jyl salyp ajary kirip, abattanǵan osy kósheniń tórinen Ýáıistiń beınesi keskindelgen ádemi taqta oryn tapty.  

– Ýáıis kóshesinde turatyn J.Nurymov, M.Bekbaýov, S.Qısanov, T.Baıdoldın syndy belsendi azamattardyń bul ıgilikti isti yqylaspen qoldap, qolǵabys jasaýynyń arqasynda saýapty sharany júzege asyrdyq. Bul árıne búkil elimiz rýhanı jańǵyryp jatqan tusta qazaq ónerine zor úles qosqan zamandasymyzdyń esimin jas urpaqtyń sanasyna sińirip, ónerin úlgi etý maqsatynan týǵan talpynys, – deıdi belgili ártistiń synyptas-dosy Muhametbek Qunapıanov.