Qazaqstannyń Eńbek jáne halyqty áleýmettik qorǵaý mınıstri Berdibek Saparbaev 2 shildede Nur-Sultanda ótken brıfıńide Teńizdegi jergilikti jáne sheteldik jumysshylar arasyndaǵy jalaqy aıyrmashylyǵy týraly aıtty dep jazady Qamshy.kz aqparat agenttigi Azattyq Radıosyna silteme jasap.

Saparbaevtyń aıtýynsha, Teńizdegi jergilikti jáne sheteldik jumysshylar arasyndaǵy jalaqy aıyrmashylyǵyn tekserý úshin arnaıy jumysshy toby qurylǵan.

"Qazaqstan zańyna sáıkes eńbekaqyda aıyrmashylyq bolmaýy kerek. Qazir sony jumysshy toby tekseredi. Jumys berýshilerden nege aıyrmashylyq bar ekenin anyqtaıdy. Odan keıin muny qalpyna keltirýge jumys jasaımyz. Al Teńizdegi jaǵdaı baqylaýymyzda", – dedi Saparbaev.

Mınıstrdiń sózinshe, arnaıy komısıa quramyna Eńbek jáne halyqty áleýmettik qorǵaý mınıstrligi, Atyraý oblysy ákimdigi men eńbek ınspeksıasy, "Teńizshevroıl" men oǵan qaraıtyn merdiger mekeme Sonsolidated Contracting Engineering and Procurement S.A.L Offshore (CCEP) ókilderi kirgen.

Sonymen qatar Saparbaev "29 maýsymda bolǵan janjal kezinde jumysshylar jalaqy men jumys jaǵdaıy týraly másele kótermedi" dep málimdedi.

"Ol jerde kóterilgeni – turmystyq másele edi. Biraq qazir olardyń eńbekaqysy, turmystary, eńbek qaýipsizdigi tekseriledi", – dedi Saparbaev.

29 maýsymda Atyraý oblysy Jylyoı aýdany Teńiz kentinde "Teńizshevroıldyń" merdigeri Consolidated Contracting Engineering and Procurement S.A.L Offshore (CCEP) kompanıasynyń jumysshylary arasynda janjal shyqqan.