Túrkistan oblysy Arys qalasynda bolǵan jarylysty Qazaqstannyń Qorǵanys mınıstri Nurlan Ermekbaev "tabıǵı apat" dep aıtyp, qoǵamnyń synyna ushyrady. Áleýmettik jelide "Aı men kúnniń amanynda oq-dáriler atylyp, snarádtar qalaǵa qaraı ushqany qalaısha tabıǵı apat bolmaq" dep mınıstrdi sókken kópshiliktiń qarasy kóp. Jýrnalıs, aqyn Eseı Jeńisuly da mınıstrdiń Arysqa qatysty aıtqanyna arnap óleń shyǵaryp, ony óziniń Facebook paraqshasynda jarıalady.
"Jýrnalıs, qyzyqsyń,
aıtaryń boldy ma?
Sheneýnik bir sózben qoıady ornyńa.
Jaı jatqan oqtumsyq ózinshe jarylsa,
Keshirim suraıtyn mınıstr sorly ma?!
Árıne, durys qoı kóńilde alańyń,
Bul degen - "minezi" Tabıǵat-Ananyń.
Neniń ne ekenin aıyra almastaı,
Mınıstr aqymaq emes qoı, qaraǵym...
Jer jetpeı jatqandaı,
qoımaǵa jaqyndap,
Úı salyp alǵan ǵoı adamdar topyrlap.
Olardyń erkine qoısań bul dúnıeni,
Bombanyń ústinde shaı iship otyrmaq.
Halyqtyń kinási úshin de bylaıǵy,
Mınıstr qalaısha keshirim suraıdy?!
Olardyń táńiri kókte emes, jerde ǵoı,
Áýre bop izdeı me, aspannan Qudaıdy?
Bul qazaq nemene?
Keshshe me, áı, tegi?
Bombadan qoryqsa, oralyp qaıtedi?
Shymkentten tam satyp alsyn da, otyrsyn,
"Úıimdi jónde" dep aıtpasyn, áıteýir...
Eshkimge bermeıdi eshkim de minis at,
Mınıstr jan emes sendermen muńy shaq.
Oqtumsyq degeniń bul beıbit zamanda,
Keı-keıde jarylyp turǵany durys-aq.
Mınıstr sóılese, sóziniń rasy -
Olardyń eshqashan bolmaıdy kinási.
Qara jer bárin de kótere beredi,
Jylasań, tek qana Allańa jylashy...", - dep jazdy Eseı Jeńisuly.
3 shildede Qorǵanys mınıstri Nurlan Ermekbaev úsh adam qaza taýyp, myńnan astam nysannyń búlinýine sebep bolǵan Arystaǵy jarylysty "tabıǵı qubylys" dep atap, halyqtan "keshirim suraýdyń retin kórip turǵan joqpyn" dep málimdegen edi.
Pikir qaldyrý