Búgin Májilistiń jalpy otyrysynda depýtattar 2019-2021 jyldarǵa arnalǵan respýblıkalyq búdjetke túzetýlerdi maquldady. Osy rette, palata spıkeri Nurlan Nyǵmatýlın memleket qabyldaǵan áleýmettik sharalar halyqtyń kóptegen problemalaryn sheshýge múmkindik beretinin aıtty dep habarlaıdy Qamshy.kz aqparat agenttigi. 

“Ózderińizge belgili, Elbasymyz Nursultan Ábishuly Nazarbaevtyń áleýmettik strategıalyq bastamalaryn odan ári jalǵastyrý maqsatynda Memleket Basshysy Qasym-Jomart Toqaev arnaıy tapsyrmalar júktegen bolatyn. Osyǵan baılanysty, turmysy tómen azamattarǵa jan-jaqty qoldaý kórsetý úshin, halqymyzdyń áleýmettik jaǵdaıyn kúsheıtý úshin naqty sharalar qolǵa alynýda. Sondyqtan, osy úsh jyldyq búdjetke engizgen ózgerister barlyq áleýmettik tapsyrmalardy jetkilikti qarajatpen qamtamasyz etýge zor yqpal etetin bolady”, - dedi Nyǵmatýlın.  

Sondaı-aq, Májilis tóraǵasy ortalyq jáne jergilikti memlekettik organdar qıyn ómirlik jaǵdaıǵa tap bolǵan adamdarǵa kómektesý jaǵyn uıymdastyrýy kerektigine basa nazar aýdardy.  

Osyǵan baılanysty Nurlan Nyǵmatýlın bólingen qarajatty paıdalanýdyń tıimdiligine nazar aýdaryp, Májilis depýtattary osy máseleni muqıat qarap, qol jetkizilgen nátıjelerdi taldaýǵa nıetti ekenin atap ótti.  

“Bárimiz, Úkimet pen depýtattyq korpýstyń músheleri, halyq arasynda túsindirý jumystaryn júrgizýimiz kerek”, - dedi Májilis tóraǵasy.  

Nyǵmatýlın sesıa aıaqtalǵannan keıin depýtattar óńirlerge barǵan kezde osy jumysqa belsene atsalysýy kerektigine toqtaldy. 

Sonymen qatar, búgingi Palatanyń tórtinshi sesıadaǵy sońǵy jalpy otyrysynda Májilis tóraǵasy Nurlan Nyǵmatýlın ótken sesıa jumysyn qorytyndylady. Óz sózinde Májilis spıkeri:  

“Búgin biz tórtinshi sesıadaǵy Májilistiń sońǵy jalpy otyrysyn ótkizip otyrmyz. Ózderińiz bilesizder, bul sesıa Májilis tarıhyndaǵy mańyzdy kezeńderdiń biri boldy. Osyǵan oraı, elimizge, halqymyzǵa qajetti kóptegen zańdar qabyldandy. Kóptegen parlamenttik sharalar ótti. Olardyń barlyǵy, eń aldymen Elbasymyz Nursultan Ábishuly Nazarbaevtyń áleýmettik-ekonomıkalyq, strategıalyq mindetterin oryndaýǵa arnaldy. Sonymen birge, Memleket Basshysy Qasym-Jomart Toqaevtyń alǵa qoıǵan tapsyrmalaryn júzege asyrýǵa baǵyttaldy”, - dedi.