Semeıde halyqaralyq «SemeySummerFest» festıvali aıasynda qaıyrymdylyq velojarysy ótip, odan túsken qarajat Arys qalasyna kómek retinde jiberildi dep habarlaıdy Qamshy.kz aqparat agenttigi. 

Atalǵan festıválge qatysýshy jastardyń qarasy kóp boldy. Olardyń qatarynda kásibı sportshylarmen qatar, áýesqoı veloshabandozdar da synǵa tústi. Jıyny otyzdan astam saıysker Pavlodar-Semeı tas jolynyń boıyndaǵy Qaraǵaıly aýdanynan Qasıetti bastaýǵa deıin 25 shaqyrym joldy júrip ótti. 

– «SemeySummerFest» festıvali aıasynda qaıyrymdylyq velojarysyn ótkizdik. Oǵan kez kelgen adamnyń qatysýyna múmkindik berdik. Shekteý qoıǵan joqpyz. Tek qatysýshylardyń daıyndyǵy bolýy talap etildi. Óıtkeni belgilengen qashyqtyq jaqyn jer emes. Qaıyrymdylyq jarysynan túsken aqshany Arysqa jiberemiz, – dedi velobáıgeni uıymdastyrýshylardyń biri Ivan Babýhın. 

Sonymen qatar atalǵan festıvál aıasynda spıdkýbıng pen shahmattan saıystar ótip, túrli konkýrstar, utys oıyndary uıymdastyryldy. Utystan túsken qarajat ta apat bolǵan Arys qalasyna joldandy.  

Bıyl tuńǵysh ret ótkizilgen «SemeySummerFest» festıvali aldaǵy ýaqytta dástúrli sharaǵa aınalmaq.