29 shildede Qostanaıdaǵy kóshelerdiń birine Nursultan Nazarbaevtyń esimin berýge baılanysty qoǵamdyq tyńdaý ótedi. Sebebi, qala ákimi Qaırat Ahmetovtyń atyna bastamashyl top birneshe ret ótinish hat jazǵan dep habarlaıdy Qamshy.kz aqparat agenttigi QazAqparat saıtyna silteme berip.

Qostanaıdaǵy Avtomobıl transporty kolejiniń pedagogtary men stýdentteri bar bastamashy top Gagarın kóshesin QR Tuńǵysh Prezıdent atyndaǵy dańǵylǵa aınaldyrý jóninde ujymdyq hat jazǵan. Buǵan qosa olar Gvardeıskıı kóshesin Gagarın kóshesine aýystyrýdy usynǵan.

"QR Prezıdenti Q.Toqaev Tuńǵysh Prezıdentimiz N.Nazarbaevtyń esimin oblys ortalyqtaryndaǵy kóshelerdiń birine berý týraly bastama kótergen bolatyn. Elbasynyń strategıalyq bastamalary arqasynda Qazaqstan ıntegrasıalyq úderisterdiń basty lokomotıvine aınaldy. Respýblıkamyz iri jáne bedeldi halyqaralyq uıymdardyń belsendi qatysýshysy sanalady. Qazaqstan álemniń eń damyǵan 30 eline kirý prosesinde kásipqoı kadrlardy daıarlaý isin mańyzdy faktorlardyń biri retinde sanaıdy. Nursultan Nazarbaev ekonomıkany qajetti eńbek resýrstarymen qamtamasyz etý máselesinde tehnıkalyq jáne kásiptik bilim berýdi damytýǵa erekshe mán berdi. Bizdiń kolej Gagarın kóshesinde ornalasqan. Iýrıı Gagarın – ǵaryshqa ushqan alǵashqy adam. Álemdegi alǵashqy ǵaryshkerdiń aty umytylmaıdy",- delingen bastamashyl toptyń hatynda.

Kolejdiń usynysyn Nazarbaev zıatkerlik mektebi, "AgromashHoldıng" kásiporny, Ortalyq stadıon basshylyǵy jáne basqa da kóptegen ujymdar biraýyzdan qoldady. Belsendiler Iýrıı Gagarın esimin Gvardeıskıı kóshesine kóshirý týraly usynysty mańyzdy dep esepteıdi.

Bul máselelerge qatysty qoǵamdyq tyńdaý 29 shilde kúni ótedi.