Shyǵys Qazaqstannyń patshalar alqabyndaǵy erekshe aınalmaly qorshaýy bar «Patsha» qorǵanynda múıizi altyn symmen órilgen buǵynyń beınesi bar Eýrazıa keńistiginde biregeı jádiger tabyldy dep habarlaıdy Qamshy.kz aqparat agenttigi.
Aıta ketý kerek, qazirgi tańda aımaqta arheologıalyq eskertkishterdi zertteý boıynsha oblystyq baǵdarlamanyń ekinshi kezeńi júzege asýda.
Oblys ákimi Tarbaǵataı aýdanyna jasaǵan jumys sapary aıasynda jańa jádigerlermen tanysty. Búginde atalmysh alqaptyń 25 shaqyrym aýmaǵynda keń kólemdi zertteý jumystary júrip jatyr. Qazaqstannyń jetekshi arheologtary Zeınolla Samashev pen Ábdesh Tóleýbaevtyń basshylyǵymen jeti top jáne Ál-Farabı atyndaǵy Qazaq memlekettik akademıasynyń ekspedısıasy iske bilek sybana kirisken. Alǵashqy jádigerler erekshe aınalmaly qorshaýy bar «Patsha» qorǵanynda tabylǵan. Olardyń qatarynda múıizderi altyn symnan órilgen buǵylardyń biregeı pishinderi, altyn áshekeıler men altyn arqarlar jáne óte usaq monshaqtar bar.
– Eleke sazy eskertkishinde bizdiń baqytymyzǵa qaraı ótken jyly «Altyn adam», bıyl da óte qyzyqty zattar taýyp jatyrmyz. Olar b.z.d. 8 ǵasyrdaǵy ata-babalarymyzdyń mádenıetin, turmys-tynysyn kórsetedi. Alǵashqy qadamymyz qutty, úmitimiz bar. Bular tek alǵashqy tabylǵan muralar, qalǵandary osy aıdyń sońynda, tamyzdyń basyna qaraı bolyp qalady, – dedi Zeınolla Samashev.
Ábdesh Tóleýbaevtiń aıtýynsha, eki aptadan keıin «Sardar-1» úlken jerleý kamerasy ashylady. Zertteý júrgizilip jatqan bul qorymda birqatar kóne medısınalyq quraldar, sonymen qatar, erte saq kezeńine jatatyn tas pyshaqtar bar.
– Bul – Qazaqstan tarıhyna jańa kózqaras. Halqymyzdyń tarıhyn qaıta jazdyratyn tyń muralar. Bizdiń tek kóshpeli el bolmaǵanymyzdy aıqyndaıdy. Ata-babamyzdyń bizdiń zamanymyzǵa deıingi 8 ǵasyrda joǵary deńgeıdegi órkenıetti qalyptastyrǵanyn dáleldeıdi. Tereń bilim men tehnologıa tilin bilgenin kórsetedi. Ony biz búkil álemge kórsetýimiz kerek. Keler jyly «Uly dala altyndary» kórmesin Stambýlda, al 2020 jyly Anglıanyń mýzeıleriniń birinde uıymdastyrýdy josparlap otyrmyz, – dedi SHQO ákimi Danıal Ahmetov.
Munda sondaı-aq, qazylǵan usaq qorymdardyń ishinde ár sıpatta jerlengen adam súıekteri tabylǵan. Máselen, basyna tas jastyq qoıyp, birge jerlengen ana men bala. Danıal Ahmetov atap ótkendeı, bul balasyn qorǵaǵan ananyń uly mahabbatynyń kórinisi.
Ekinshi molada jasóspirim balany besik sulbasynda jasalǵan tasqa salyp jerlegen. Bul shamamen qola kezeńiniń mádenıetine jatady. İshine qoıdyń eti salynǵan qasyndaǵy keramıkalyq qumyra erte saq dáýiriniki kórinedi. Ǵalymdardyń aıtýynsha, úshinshi eskertkish mólsheri úısin, qulajorǵa mádenıetine jaqyn. Er azamattyń súıeginiń qasynda pyshaq, qumyra, sondaı-aq, quıryq maı qoıylǵan. Oǵan dálel quıymshaqtan qalǵan qaldyq.
– Eleke sazy alqabynda b.z.d 8 ǵasyrdan b.z. 8 ǵasyrǵa deıingi aralyqty qamtyǵan úzilmegen baılanys jatyr. Sózsiz, jumysty bitirgennen keıin bul alqap halqymyzdyń maqtanyshy bolady. Sondaı-aq, munda Azıadaǵy jalǵyz Qaǵan keshenin zerttep jatyrmyz. Biz Monǵolıada tabylǵan Bilge qaǵan, Kúltegin keshenderin bilemiz. Eleke sazynda tabylǵan biregeı keshen sonyń syzbasyn qaıtalaıdy. Jaqyn arada bizdiń eki myqty ǵalymymyz álemge jańa Qazaqstandy pash etedi degen senimdemin, – dep qorytyndylady Danıal Ahmetov.
