Frans Pres aqparat agenttiginiń AQSH sheneýnigine silteme jasap habarlaýynsha, Phenán qysqa qashyqtyqqa ushatyn zymyran synaǵan.

430 shaqyrymǵa ushqan zymyrandar Japonıanyń ekonomıkalyq aımaǵyna jetpeı, teńizge qulaǵan. Japonıa qorǵanys mınıstrliginiń habarlaýynsha, zymyrandar eldiń qaýipsizdigine qater tóndirmegen. Mınıstrlik basshysy Takesı Ivaıa Phenánnyń zymyran synaýyn "ókinishti jaǵdaı" dep atady.

Soltústik Koreıa mamyr aıynda qysqa qashyqtyqqa ushatyn birneshe zymyran synady. Sáýir aıynyń ortasynda KHDR basshysy Kım Chen Yn "taktıkalyq maqsatta basqarylatyn zymyrannyń" jańa túrin synaýǵa qatysty. AQSH sarapshylary osy synaqtar arqyly Phenán Vashıngtonǵa qysym jasaǵysy keledi dep boljady. Koreıa túbegin ıadrolyq qarýdan tazartý jónindegi kelissózder sátsiz aıaqtalǵan edi.

Soltústik Koreıa aqparat quraldarynyń habarlaýynsha, turǵyndar "sýda jáne áýede turýǵa ázir", biraq shetel qysymyna qaımyqpaıdy. Phenán Vashıngtonǵa jyl aıaǵyna deıin "bir amalyn tabýǵa" ýaqyt beredi, áıtpese ol óz qaýipsizdigin qamtamasyz etýdiń "basqa jolyn" tańdaıdy.

Aqpan aıynyń sońynda Hanoıda KHDR men AQSH ekinshi samıtin ótkizdi. Kezdesý sátsiz aıaqtaldy – Donald Tramp pen Kım Chen Yn birlesken deklarasıa qabyldamady.