Jolaýshy tasymalynyń qaýipsizdigin qamtamasyz etý maqsatynda Almaty ákimi Baqytjan Saǵyntaev birqatar tapsyrmalar berdi dep habarlaıdy Qamshy.kz aqparat agenttigi. 

Ol týraly qala ákimi feısbýk áleýmettik jelisinde jazdy. 

"Búgin ákimdikte qoǵamdyq kólik salasynyń jumysyn jete qaradyq. Naqtyly jumystar júrýde. Jyljymaly sostavtyń avtobýs parki jańarýda. Jolaıryqtaryn salý jalǵasýda. Degenmen, sheshimin kútken máseleler bar", - dedi ákim.

Birinshiden, avtobýs parkteri úshin bilikti kadrlar — júrgizýshiler, servısti mamandar, ıaǵnı slesarlar men mehanıkter jáne basqalary jetispeıdi. Olardy daıarlaýdyń júıesi joq. Qalalyq mobıldilik (Telibaevqa) jáne bilim (Qojabergenova) basqarmalaryna bilikti kadrlar daıyndaýdyń naqtyly sharalaryn jasaýdy tapsyrdym. Bul jumysty kadrlar qajettiligine boljam jasap ýaqytyly ári kolejderdiń oqý josparyna saı júrgizgen jón. Apta ishinde Telibaev bul prosesti uıymdastyrýdyń naqtyly mehanızmin usynýy tıis.

Ekinshiden, ekologıalyq taza kólik — Almatynyń troleıbýs jelisi durys baǵalanbaı keledi. Bulardaǵy baılanys jelileri tozǵan, kún saıyn úzilip jatady. Ákimdikke qalanyń barlyq troleıbýs jelisin jóndeýdi tapsyrdym. Bıylǵy jyldyń ózinde Tımırázev kóshesi boıyndaǵy barlyq 5,1 km jeli aýystyrylady. Qajetti qarjyny bólemiz. Jańa troleıbýstardy satyp alý jumystaryn qatar júrgizip, keler jyly jańa baǵyttardy ashamyz. Qazirgi kezde transformatorlary qosalqy stansıalardyń qýattary álsiz, sondyqtan olardy da jańartýdy qolǵa alamyz. Bir sózben aıtqanda, Almatynyń troleıbýs jelisi — elimizdegi eń iri kólik tarmaǵy.

Úshinshiden, qala syrtyna tasymaldaý máselesi pisip jetilgen sıaqty. Kún saıyn 61 baǵyt boıynsha 600 avtobýs qatynaıdy. Qyzmet kórsetý sapasy tómen. Avtobýstardyń basym bóligi tozǵan. Sondyqtan bul máseleni de retke keltirgen jón. Eski kólikti aýystyryp, jolaýshylarǵa bılet berý júıesin ashyq etý qajet. Qalalyq mobıldilik basqarmasyna (Telibaevqa) qalda modelin ýnıfıkasıalaý sharalaryn qarastyrýdy tapsyrdym.

Bul sharalardyń basty maqsaty — qalalyqtarǵa sapaly kólik qyzmetin kórsetý jáne jolaýshy tasymalynyń qaýipsizdigin qamtamasyz etý.