Áı, ómir-aı! Pendeniń basyna ne kelip, ne ketpeıdi?! Aıtaıyn dep otyrǵanym da – sondaı bir qıyn zamannyń oqıǵasy. Alqymnan alǵan asharshylyq el-jurttyń eńsesin ábden túsirip, qaraıǵan tóbeshikterde qabirdiń kóbeıgen kezi. Mine, sol bir súrkeıli tusta bir januıa tiske basar túk tappaı, ashtyqtyń qursaýynda qabyrǵalary qabysyp, ishekteri jabysyp, ólim men ómir arasynda arpalysyp jatqan-dy. Bala-shaǵasynyń kóz aldynda kóz jumýyn qalamaǵan otaǵasy, óz etin balalaryna azyq etýge sheshim shyǵarady. Sóıtti de, áıeline ózin óltirip, denesin esik aldyndaǵy qarǵa kómip qoıyp, balalaryna kóktemge deıin talǵajaý etýin aıtyp, kóktem kelgen soń shóptiń tamyryn qazyp jep kún kórip ketesińder degen keńes beredi. Sonda áıeli kúıeýiniń keýdesine mańdaıyn súıep, jylap turyp: “Búgin balaryńyz ashtyqtan aman qalar biraq erteń “bular ákeleriniń etin jegender” degen jaman at ashtan ólgennen de jaman ǵoı!” dep egiledi. Al, balalary ózderi ólim aýzynda tursa da: “Onanda ólgenimiz jaqsy, ákeshim, biz sizdi qalaı óz qolymyzben ólimge qıamyz?! Óıtip tiri qalǵannan ólgenimiz artyq” –  dep ákeleriniń aıtqan bul usynysynan bas tartady. Kóziniń jasy kól bolyp sharasyz áke ash qursaq balalaryn qushaqqa alady. Ia, bul degenimiz: “Janym – arymnyń  sadaqasy” dep uıatty ólimnen de bıik qoıǵan rýhty eldiń áli de bolsa buǵanasy qatpaǵan, qarshadaı balalarynyń esti áreketi edi. Aptalap qapalaqtaǵan qalyń qar aýlany basyp qalǵan. Ashtyqtan dármeni quryp, álderi ketkendikten qardy tazartýǵa da shamalary kelmegen-di. Osyndaı halge túsip, úmitteri uzilgen olar otaǵasynan bir amalyn tabýdy ótinedi. Ne isterin bilmeı taǵaty taýsylǵan otaǵasy tóńirekke kóz tastap turyp, kenet qardan tazartylǵan kórshisiniń aýlasyna kózi túse qaldy. Qardy kúreýge kúshteri kelgenine qaraǵanda, jeýge bolarlyq bularda birdeńe bar-aý, dep topshylaǵan ol, kórshisin tonamaqshy bolady. Sóıtip, qolyna qara qanjaryn alyp, kórshisiniń úıine barady da, olarǵa qolyndaǵy qarýyn kezep turyp: “Úılerińde jeýge bolarlyq ne bar? sony shyǵaryńdar, bolmasa baýyzdap óltiremin!”, – dep qorqytady. Tiri qalý úshin eshteńeden taıynbaıtynyn túsingen kórshileri qaptyń túbinde qalǵan bir ýys undy qolyna ustata salady. Osy oljalaryn tóbesi kóringen kóktemge deıin shymshymdap jetkizgen januıa ashtyqtan aman qalady. Aınalaıyndar-aı, órimdeı bolyp alyp, ózderi ólim halinde tursa da, óz ómirlerin ákeleriniń ómirinen bıik qoımady. Ólimdi qasqaıa kútýge daıyn boldy. Al, bizdiń qoǵamymyzda keıbir ata-analaryn qańǵytyp qýyp jiberetinder, tipti, jaýyzdyqpen óltirip jatqandar da joq emes. Bolmashy bir dúnıe nemese páter úshin arsyzdyqqa baryp jatqandardyń basyna osyndaı asharshylyq kelse ne ister edi?! Átteń, átteń!!!... Aqyrettegi azapty bilse ǵoı, shirkin! İstemek túgili, eshqashan ondaıdy oılamas ta edi sol adamdar. Minekı, áne-mine degenshe qasıetti Ramazan aıynyń da esiginen enip, jol ortasyna jetip qaldyq. Keı baýyrlarymyz; "kún uzaq, onyń ústine oraza shildeniń shilińgir ystyǵyna tuspa-tus kelip tur ǵoı, oraza ustap shydaı almaspyn" degen oımen opyrylyp, synyp jatatyr.  Bir ýys unmen búkil bir januıa  asqazandaryn aldap, ashtyqtan aman qalǵan kezde, mynandaı toqshylyqta turyp shúkirlik etip, Alla Taǵalanyń razylyǵy úshin, jylyna bir ret keletin orazadaǵy azannan keshke deıingi ýaqytsha ǵana ashyǵýǵa shydamaý, tipti, múmkin be?!... Joq. Múmkin emes. Tek, nıet týra bolsa bolǵany. Azannan keshke deıingi ashyǵý sizdiń shamańyzdan tys nárse emes. Óıtkeni, Alla Taǵala Quranda:

– degen. («Baqara» súresi, 286-aıa) Birlik TOQAI