Birde Oshákasama* jumaqtaǵy lotos kóliniń túbinde serýendep júrgen-di. Kól ishindegi lotos gúlderi marjandaı jarqyrap, aınalany jupar ıiske bólep tur. Jumaqtyń tańy. Oshákasama lotos japyraqtarynyń arasynan tómenge qarady. Jumaqtaǵy lotos kóliniń astynda tozaq jatyr. Jumaqtyń átirdeı jupar ańqyǵan hám tunyq sýynan tómendegi tozaqtyń istik-istik taýlary ap-aıqyn kórinedi. Tozaqtyń tereńinde, qaınaǵan qylmyskerdiń arasynda Kandata da bar. Bul tiri kezinde kisilerdi óltirip, úı-jaıyn órtep degendeı, kóp qylmys jasaǵan Úlken kúnákar edi. Degenmen, onyń ómirinde jasaǵan jalǵyz ǵana jaqsylyǵy bar-tyn. Kandata birde qalyń toǵaıdyń ishimen kele jatyp, jol jıeginen quıtaqandaı órmekshini kóredi. Aıaǵymen basyp tastaıyn deıdi de, biraq «jo-joq, kishkentaı   bolǵanmen bul da tirshilik ıesi ǵoı» dep,  órmekshige tımesten kete barady. Oshákasama tozaqtaǵy jaǵdaıdy baqylap otyryp, Kandatanyń bir kezderi órmekshini óltirmegendigi esine túsedi de, sol jaqsylyǵy úshin álgini tozaqtan shyǵarýǵa bekinedi. Jumaqtaǵy laǵyldaı jarqyraǵan lotos japyraqtarynyń ústinde bir tal órmekshi kúmisteı jyltyraǵan órmek toqyp otyrǵan-dy. Oshákasama álginiń jibinen alyp, appaq nurly lotostyń arasynan tómendegi tozaqqa túsirdi.

Mynaý tozaqtyń qaınap jatqan qan kóli. Osy kólde basqa qylmyskerlermen birge Kandata da maltyǵyp júr. Qap-qara túnektiń arasynda asa úreıli istik taýdyń ıneleri ǵana aǵarańdaıdy. Qylmyskerlerdiń yńyranǵan dybysy estiledi. Bunda túsken pendeler tozaqtyń azabynan syńsyp, yńyrsyǵannan basqaǵa shamasy kelmeı qalǵan edi. Úlken kúnákar Kandata da qan kóliniń ishinde qanǵa shashalyp, ólermen baqanyń kúıin keshýde. Bir kezde túnektiń arasynan, alystaǵy aspannyń joǵary jaǵynan kúmis tústi jip-jińishke órmekshiniń jibi sozylyp kelip Kandatanyń dál tóbesine túspesi bar ma? Úlken kúnákardyń qýanǵannan esi shyqty. Osy jipten ustansań, áıteýir tozaqtan qutylaryń haq. Órmekshiniń jibi jumaqqa aparýy da ǵajap emes. Tozaqtan shyqsań, istik taýdyń ınelerine de shanshylmaısyń, qan kóline de tunshyqpaısyń. Osyndaı oımen Kandata órmekshiniń jibinen qos qolymen ustap, órmeleı bastady. Ol tiri kezinde kánigi qylmysker bolǵandyqtan órmeleýdiń san tásilin biletin. Tozaq pen jumaqtyń  arasy myńdaǵan lı. Jumaqqa jetý ońaı emes. Biraz ýaqyttan keıin Kandata qaljyrap, ary qaraı órmeleýge áli kelmeı qaldy. Dem almasa bolmas. Ol tómenge kóz jiberdi. Ózi maltyqqan qan kóli túnekke oranǵan. Aǵarańdaǵan istik taýdyń ıneleri de alysta qalypty. Osy qalpymen órmeleı berse, tozaqtan birjolata shyǵary sózsiz. Órmekshiniń jibinen qos qolymen qarmanyp alǵan Kandata «men aldamyn, men aldamyn» dep qarqyldap kúlip jiberdi. Tozaqqa túsken  talaı jyldan beri kúlgeni osy. Kandata taǵy  da tómenge qarady. Qumyrsqadaı qujynaǵan qalyń qylmysker bunyń izimen órmelep keledi eken. Úlken kúnákar arandaı aýzyn ashqan qalpy, kózi baqyraıyp, álgilerge qarap qalypty. «Myna jip-jińishke talshyq meni ǵana qutqarý kerek. Osynaý qujynaǵan kóptiń salmaǵynan úzilse, qurdymǵa ketem be? Órmelep kele jatqan qylmyskerdiń sanynda shek joq. Órmekshi jibiniń úzileri anyq». Kandata «Eı, qylmyskerler! Bul meniń jibim. Qane túsińder! Tús, tús!» dep aqyryp jiberdi. Sol kezde... Sol kezde órmekshiniń jibi Kandata ustap turǵan jerden byrt etip úzilip ketti. Úlken kúnákar qańbaqtaı quldyrap túnektiń túbine tústi de ketti. Jumaqtaǵy órmekshiniń jibi jalt-jult etip, aı-juldyzy kórinbes tymyq áýede salbyrap tur.

Oshákasama lotos kólinen bárin baqylap turǵan-dy. Ol tozaqtaǵy qan kóline tas sıaqty sholp ete túsken Kandataǵa muńaıa qarady. «Tozaqtan ózim ǵana shyǵýym kerek» degen Úlken kúnákar ózimshildigi úshin jazalandy. Jumaqtaǵy lotos gúlderi burynǵysynsha marjandaı jarqyrap, aınalany jupar ıiske bólep tur. Jumaqta tús aýyp barady.

Aýdarǵan: Sharafat Jylqybaeva