Keshe Qazaqstan Prezıdenti Nursultan Ábishulynyń kezekti suhbaty «Habar» jáne «KTK» arnalary arqyly halyqqa taratyldy. Shyntýaıtyna kelgende, Elbasy buǵan deıin de  ártúrli jaǵdaılarda, ár túrli jerlerde jýrnalıser qaýymyna suhbat berip kelgen. Alaıda, bul joly bári ózgeshe. Rıasyz. Dálirek aıtsaq, qazaqstandyq BAQ bul jolǵy Prezıdent suhbatyn  rıasyz, ashyq áńgime túrinde órbigen, tuńǵysh dep baǵalaýda.

Iá, bul joly Elbasy barynsha ashyq áńgime órbitýge tyrysqany jalǵan emes. Ol ásheıinde, BAQ-qa aıta bermeıtin, jasyryn dúnıelerdi de búkpesiz ashyp saldy. Qaıran qaldyq. Prezıdent Nazarbaev óziniń kúıeý balasyn qamatýǵa qatysty jurt bile birmeıtin keıbir jaılardy da búrkemelep qalmady. Óz nemereleriniń, qyzynyń Álıevke keshirim jasaýyn ótinip kelgenin, alaıda zań bárimizge ortaq, birdeı ekenin túsindirgenin aıtty. Dese de, qazaq qoǵamyn tolǵandyratyn máselelerdiń bastysy bul emes edi. Jahandyq daǵdarystyń derti asqynyp turǵan osynaý kezeńde qazaqstandyqtardy alańdatatyny -  Eýrazıalyq ıntegrasıanyń qazirgi ahýaly men keleshegi. Osy rette «Qamshy» portaly Elbasynyń 100% resmı tilde (orys tili) bergen suhbatynan  Kedendik jáne Eýrazıalyq ekonomıkalyq odaq jaıly aıtqan sózderinen úzindini nazarlaryńyzǵa usynýdy jón kórdi.

Áýeli Nursultan Ábishuly bizdiń eldegi iri-iri kompanıalar men sheteldik kompanıalardyń  bárin memleket óziniń qadaǵalaýynda ustap otyrǵanyn, sheteldik ınvertorlaǵa bola alańdaýshylyq tanytýdyń esh sebebi joqtyǵyn aıtty.

«Qazaqstandaǵy barlyq sheteldik jáne qazaqstandyq iri kompanıalar memlekettiń nazarynda. Oǵan alańdaýdyń esh qajeti joq. Olar memlekettiń ruqsatynsyz eshteńe sata da, satyp ala da almaıdy. Birinshi usynysty mindetti túrde Úkimet jasaýy tıis jáne olar ózidigenen júıeni ózgerte de almaıdy. Tıisinshe biz de olardyń jumys jasaýlaryna bar jaǵdaıdy jasap berip otyrmyz. Kelisim sharttardy jasaǵanda munyń bári qamtylǵan»,-dedi Nursultan Ábishuly.

Iá, sońǵy jyldary odaqtasymyzdyń halyqaralyq arenadaǵy (saıası arenadaǵy) bedeliniń tómendegeni, álem elderiniń  Reseıge qarsy sanksıalardy qarsha boratýy óz kezeginde  Eýrazıalyq ekonomıkalyq ıntegrasıa aıasyndaǵy elderge, sonyń ishinde RF-nyń eń jaqyn seriktesi sanalatyn  Qazaqstanǵa da salqynyn tıgizbeı turmasy anyq. Osyndaı daǵdarys kezeńindegi ekonomıkalyq odaqtyń jaǵdaıy týraly baıandaǵan Elbasy,

«ári qaraı Eýrazıalyq odaqqa keler bolsaq, qazir árıne qıyn kezeńderdiń birindemiz. EEO-ny synaýǵa  bolady. Eýrazıalyq ekonomıkalyq odaq ydyraıtyn boldy deıtinder de tabylady. Jasyratyn túgi joq. Ortaq ekonomıka quldyrady. Ortaq saýda kórsetkishi tómendedi. Mine, jaǵdaı osyndaı. Biz ekonomıkalyq odaq qurylar kezde biz mundaı qaýipterdiń oryn alatynyn eskertken bolatynbyz. Saýda quldyrady. Sebebi, baǵa tómendedi»,-degen bolatyn.

«Biz Reseıden, munaı, gaz ónimderin tasymaldaıtynbyz. Qazir baǵa quldyrady. Al bul óz kezeginde ortaq saýda kórsetkishine áser etti. Nátıjesinde, saýda kórsetkishi 15-20 paıyzǵa tómendedi. Tómendedi, biraq, kóteriledi ǵoı.  Ekonomıkalyq odaq qıyn kezeńderge tap bolǵanymen, eki el arasyndaǵy seriktestik baılanys esh ózgergen joq qoı. Óskemendegi mashına qurastyrý zaýyttary, Soltústik Qazaqstandaǵy Kamaz qurastyrý zaýyttary nemese belorýstermen birlesip qurastyrylatyn taý -ken oryndaryna arnalǵan aýyr mashına zaýyttary bar.  Eger aradaǵy baılanysqa syzat tússe, munyń biri de bolmas edi»,-degen Elbasy Nursultan Nazarbaev qudaıy kórshimiz Reseıdiń álemdik sanksıanyń tópesinde qalýy, odaqtas elderdiń ortaq ekonomıkasyna yqpal etkendigin túsindirdi. Aıtpaqsha, Elbasy sózine súıensek, munyń bári ótkinshi. Iá, Prezıdenttiń myna bir sózi Eýrazıalyq ekonomıkalyq odaqtyń ejelgi álternatıvsy – Eýropalyq odaqtyń Reseıge qyryn qarap otyrǵany, saıası oıyn ekendigin ańǵartqandaı boldy.

«Men taǵy da abyzsynǵym kelmeıdi. Keleshekte,  bizdiń Eýrazıalyq odaq pen Eýropalyq odaq mindetti túrde seriktes bolady, birlesedi. Bul Alladan jazylǵan, ámir etilgen. Sondyqtan qazirgi sanksıa degenderińiz ýaqytsha dúnıeler. Tarıhta budan zorǵylary bolǵan»,-dedi Prezıdent Nazarbaev.

Nurgeldi Ábdiǵanıuly