Saltanatty shara aıaqtalǵan soń Qasym-Jomart Toqaev pen Sı Szınpın kelissóz zalyna ótti.

Qazaqstan Prezıdenti qytaı kóshbasshysymen Bishkekte ótken Shanhaı Yntymaqtastyq Uıymynyń samıtinen keıin araǵa birneshe aı salyp, qaıta jolyqqanyna óte qýanyshty ekenin aıtty. Qasym-Jomart Toqaev QHR Tóraǵasyna qonaqjaılyq kórsetkeni úshin rızashylyq bildirip, qytaı kóshbasshysynyń dosy, Qazaqstannyń Tuńǵysh Prezıdenti Nursultan Nazarbaevtyń sálemi men ystyq yqylasyn jetkizdi.

– Bizdiń kezdesýimiz QHR-nyń 70 jyldyq mereıtoıy qarsańynda ótip otyr. Osy sátti paıdalanyp, Sizdi jáne tutas qytaı halqyn aıtýly datamen quttyqtaǵym keledi. Qytaı bul mereıtoıǵa áleýmettik-ekonomıkalyq jáne saıası damý turǵysynan zor jetistikpen jetip otyr. Osy oqıǵa tek Qytaı Halyq Respýblıkasy úshin ǵana emes, kúlli álem úshin tarıhı mánge ıe dep oılaımyn. Sizdiń memlekettiń damýy dúnıejúziniń jiti nazarynda,– dep atap ótti Memleket basshysy.

Memleket basshysynyń aıtýynsha, osy jetpis jyldyq jol qytaı úshin óte aýyr boldy. Biraq 1970 jyldardyń sońynda Den Sáopınniń basshylyǵymen qolǵa alynǵan reformalardyń arqasynda qytaı halqy óz damýynda orasan zor jetistikke jetti.

– Qytaıdyń tabystary memleketterimiz arasyndaǵy yntymaqtastyqty damytý úshin berik negiz bolady dep sanaımyz. Búgin biz Birlesken málimdemege qol qoıamyz. Bul qujat boıynsha Qazaqstan men Qytaı uzaqmerzimdi, strategıalyq jáne jan-jaqty seriktestikti damytýǵa beıildi ekenin kórsetedi. Joǵary deńgeıde qol jetkizgen ýaǵdalastyq eki el arasyndaǵy yntymaqtastyqty odan ári damytý úshin salmaqty quqyqtyq jáne saıası baza bolyp tabylady, – dedi Qazaqstan Prezıdenti.

QHR Tóraǵasy Sı Szınpın óz sózinde Qazaqstannyń Ortalyq Azıadaǵy iri el sanalatynyn jáne Ortalyq Eýrazıada úlken yqpaly bar ekenin aıtty.

– Qazaqstannyń Tuńǵysh Prezıdenti Nursultan Nazarbaevtyń basshylyǵymen elderińiz zor tabysqa qol jetkizdi, ulttyq erekshelikke negizdelgen damý úlgisin qurdy. Siz Prezıdent bolǵannan keıin ózińizdiń sabaqtastyq, ádilettilik jáne ilgerileý jónindegi úsh ustanymyńyzdy jarıaladyńyz. Ekonomıkany damytýdy, jumys oryndaryn ashýdy, sybaılas jemqorlyqpen kúresýdi, áleýmettik qorǵaý deńgeıin kóterýdi aldyńyzǵa maqsat etip qoıdyńyz. Bul – Qazaqstan halqynyń úmitin aqtaıdy.  Sizdiń barlyq bastamalaryńyz osyǵan baǵyttalǵan. Dostas Qazaqstan halqyna baq-bereke jáne tabys tileımin, – dedi Qytaı kóshbasshysy.

Qazaqstan Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy júrgizgen kelissózder qorytyndysy boıynsha mynadaı qujattarǵa qol qoıyldy:​ 

1. Memleketter basshylarynyń birlesken málimdemesi;
2. Qazaqstan Respýblıkasynyń Úkimeti men Qytaı Halyq Respýblıkasy Úkimetiniń arasyndaǵy avıasıalyq izdeý jáne azamattyq áýe kemelerin qutqarý salasyndaǵy yntymaqtastyq týraly kelisim;
3. Qazaqstan Respýblıkasynyń Úkimeti men Qytaı Halyq Respýblıkasy Úkimetiniń arasyndaǵy «Nurly jol» jańa ekonomıkalyq saıasaty (NJ JES) men «Jibek jolynyń ekonomıkalyq beldeýi» (JJEB) qurylysyn ushtastyrý jónindegi yntymaqtastyq josparyn júzege asyrýǵa baılanysty ózara kómek týraly memorandým;
4. Qazaqstan Respýblıkasynyń Úkimeti men Qytaı Halyq Respýblıkasy Úkimetiniń arasyndaǵy QHR Úkimetiniń Qazaqstan tarapyna sýperkompúter berý jobasy jónindegi yntymaqtastyq týraly kelisim;
5. Qazaqstan Respýblıkasynyń Saýda jáne ıntegrasıa mınıstrligi men Qytaı Halyq Respýblıkasynyń Komersıa mınıstrligi arasyndaǵy ózara túsinistik týraly memorandým;
6. Qazaqstan Respýblıkasynyń Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasyndaǵy Qytaı Halyq Respýblıkasyna Qazaqstan Respýblıkasynan eksporttalatyn sút ónimderine qoıylatyn ınspeksıalyq, karantındik jáne veterınarlyq-sanıtarlyq talaptar jónindegi hattama;
7. Qazaqstan Respýblıkasynyń Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasyndaǵy Qytaı Halyq Respýblıkasyna Qazaqstan Respýblıkasynan eksporttalatyn jún shıkizatyna qoıylatyn ınspeksıalyq, karantındik jáne veterınarlyq-sanıtarlyq talaptar jónindegi hattama;
8. Qazaqstan Respýblıkasynyń Qarjy mınıstrligi men Qytaı Halyq Respýblıkasynyń Bas keden basqarmasy arasyndaǵy zıatkerlik menshik quqyǵyn shekara mańy qorǵaý salasyndaǵy yntymaqtastyqty nyǵaıtý jónindegi memorandým;
9. Qazaqstan Respýblıkasynyń Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasyndaǵy Qytaı Halyq Respýblıkasyna Qazaqstan Respýblıkasynan eksporttalatyn zyǵyrǵa qoıylatyn ınspeksıalyq, karantındik jáne veterınarlyq-sanıtarlyq talaptar jónindegi hattama;
10.  Qazaqstan Respýblıkasy men Qytaı Halyq Respýblıkasy arasyndaǵy keden shekarasy arqyly taýarlar men kólik quraldaryn alyp ótý týraly aldyn ala aqparat almasý jónindegi tehnıkalyq spesıfıkasıa.