Shymkentte jolaýshylar avtobýsy jeńil kólikpen soqtyǵysty, - dep habarlaıdy Qamshy.kz aqparat agenttigi Habar 24-tiń deregin negizge alyp. Soqqydan avtobýstyń bir janyna aýdarylyp qalǵany aıtylady.
Nátıjesinde bir adam qaza tapty, ol — kondýktor. 13 adam jaraqat aldy. Onyń úsheýi — bala. Zardap shekkender aýrýhanaǵa jetkizildi.
"Bir áıeldiń jasy 39-da, ol jansaqtaý bóliminde jatyr. Ol mıy shaıqalyp aýrýhanaǵa túsken. Barlyǵy aýrýhanaǵa 10 adam jatqyzylǵan. Eń kishisi 17 jasta, al eń úlkeni 56-da", - dep habarlady № 1 qalalyq klınıkalyq aýrýhana qabyldaý bóliminiń meńgerýshisi Ótkirjan Moldahanov.
Bul derek boıynsha sotqa deıingi tergep-tekserý QR QK-niń 345-babynyń 3-bóligi boıynsha júrip jatyr. Sot saraptamasy taǵaıyndalǵan.
