Jýrnalıs Janbolat Mamaı bastaǵan bir top belsendi Qazaqstanda jańa demokratıalyq partıa quratyndaryn málimdedi. Bul týraly belsendiler búgin, 16 qazanda Almatydaǵy adam quqyǵyn qorǵaý búrosynda ótken baspasóz máslıhatynda aıtty.

Baspasóz máslıhatynda Mamaıdan bólek, saıasatker, qoǵam qaıratkeri Tólegen Júkeev, jýrnalıs Sergeı Dývanov, jýrnalıs Ásel Jańabaeva sóz sóıledi. Olar partıa qurýdy burynnan josparlap júrgenderin aıtty.  Olardyń aıtýynsha, qurylǵaly otyrǵan partıa "Qazaqstannyń demokratıalyq partıasy" dep atalmaq. 

- Biz Qazaqstanda jańa saıası, demokratıalyq partıa quratymyzdy málimdegimiz keledi. Biz bul máseleni keshe nemese búgin ǵana kótergen joqpyz. Bul oı bizde burynnan bar boldy. Bizdiń basty maqsatymyz - saıası reforma júrgizý. Saıası tutqyndardyń bostandyǵyna qol jetkizý. Aron Arynbek, Muhtar Jákishev sıaqty saıası tutqyndardyń bosatylyp, memlekettiń olarǵa ótemaqy tólegenin qalaımyz. Sondaı-aq, Qazaqstanda "mıtıńige zańsyz shyqty dep" belsendiler men azamattardy 15 táýlikke qamaıdy. Osy jaǵdaıdy ózgertkimiz keledi. Biz Ádilet mınıstrligine ótinish tastap, bárin zańdy túrde jasaımyz", - dedi Mamaı.

Baspasóz jıynyna skaıp arqyly qatysqan jýrnalıs Sergeı Dývanov qurylǵaly otyrǵan partıany "tirkeýden ótkizý qıyn" bolatyn jetkizdi. 

- Tirkeı me, joq pa, ekinshi másele. Birinshiden tirkeý prosedýrasynyń ózi mańyzdy. Eger jańa saıası partıany tirkemeıtin bolsa, bıliktiń demokratıaǵa qaraı qadam basýǵa qulqy joq ekeni, Qazaqstan prezıdenti Qasym-JomartToqaevtyń saıası reforma týraly aıtqandarynyń jaı sóz ekeni belgili bolady. Onda bılik birjola senimnen aıyrylady, - dedi Dývanov.

Janbolat Mamaı "Qazaqstanda ózgeris jasaýǵa talpynyp júrgen toptar bar" ekenin aıtyp, olardy birigýge shaqyrdy.

- Bizde ártúrli saıası kúshter men toptar bar. Men barlyǵyn birlikke shaqyramyn. Demokratıalyq qoǵamdy ańsaıtyn saıası kúshterge birigeıik degim keledi. Bólisetin esh nárse joq, biz birge bolýymyz kerek. Árkim ustanǵan pozısıasyna qaramastan, búgingi bılikti ózgertkisi kelse birge jumys isteýi tıis. Úlken kúrdeli máselelerdi sheshýde bir jaǵadan bas, bir jeńnen qol shyǵaryp, qoıan-qoltyq jumys jasaıyq. Biz táýelsiz, óz pikirin ashyq aıta alatyn azamattardy partıaǵa qosylýǵa shaqyramyz. Qazaqstandaǵy shyn ózgeristerdi qalaıtyn azamattar qatarymyzǵa qosylsyn, - dedi Mamaı.