Osy bizdiń Úkimet bárin kerisinshe isteýdi átedke aınaldyryp alǵan sekildi kórinedi maǵan. Saıasatker Rasýl Jumaly aıtpaqshy, reseılik «MýzTV» kánsertine mıllıon dollar tabylǵanda, ózimizdiń eń basty toıymyz – Qazaq handyǵynyń 550 jyldyǵyna teńge tabylmaı qalady. Dúnıejúzi ótkizýden qorqa-qashatyn EKSPO kórmesine mıllıardtaǵan dollardy aıamaı kep quıamyz da, qarapaıym mektepterdegi oqýshylardyń tegin asyna bóletin qarjyny qysyp, Aýzymyzdy qý shóppen súrtemiz. Proreseılik KO men EEO kirgenimizge toqmeıilsip, masattanamyz da, myńdaǵan kıikterimizdiń, tórt-túlik maldarymyzdyń jappaı qyrylǵanyna kóz juma salamyz. Sol Reseı protondarynyń kesirinen Qazaqstanniń ekologıasy irip-shirip jatqany. Astananyń týǵan kúnin toılaýǵa mıllıondap aqsha bólgende aldymyzǵa jan salmaımyz da, halyqqa paıdasy tıer bir ıgilikti iske bilek sybana kirisýden qashqaqtaımyz-aý kelip. Iá, Rasýl Jumaly aıtqandaı, qazaq tilinde aqparat taratatyn telearnany (El arna) jaba salý túkke turmaıdy bizge. Esesine reseılik RBK arnasyn ashyp beremiz. Sondaı-aq «Bilim jáne Mádenıet» degen kópkórim telearnanyń basshysy etip – memlekettik tilde bir aýyz sóz aıta almaıtyn adamdy taǵaıyndaýǵa qymsynbaımyz. Qyzyq, á?
Osylardy kórgende Abaı hákimniń úshinshi qara sózi oıǵa oralady eken. «Osy kúnde qazaq ishinde «isi bilmes, kisi biler» degen maqal shyqty. Onyń mánisi: «isińniń túzýliginen jetpessiń, kisińniń amalshy, aılalylyǵynan jetersiń» degen sóz. Úsh jylǵa bolys saılanady. Áýelgi jyly «Seni biz saılamadyq pa?» dep eldiń buldanǵandyǵymen kúni ótedi. Ekinshi jyly kandıdatpenen ańdysyp kúni ótedi. Úshinshi jyly saılaýǵa jaqyndap qalyp, taǵy bolys bolyp qalýǵa bolar ma eken dep kúni ótedi. Endi nesi qaldy?»
Biz de she? Naýqanshyl depýtattar men qulqynshyl basshylardyń kesirinen ózimizdikin ózge jep boldy. Endi nemiz qaldy? Iá, osy bizdiń bılikteler «qazaqqa» qarsy jumys jasap jatqan joq pa? 
«Á, qudaı, jas baladaı qaıǵysyz qyla gór!»

Nurgeldi Ábdiǵanıuly