Shaǵyn jáne orta bıznesti damytý-memlekettik saıasattyń baǵyty. Bul turǵyda Memleket basshysy Qasym-Jomart Toqaev salaǵa serpilis syılaıtyn tyń mindetter júktep otyr. Osy oraıda Jambyl oblysynda memlekettik baǵdarlamalardyń arqasynda jumysyn jolǵa qoıǵan óndiris oshaqtary áleýmettiń áleýetin arttyrýǵa da atsalysýda. Solardyń biri-«Talas Investment Company» jaýapkershiligi shekteýli seriktestigi.

Aıta ketý kerek, kompanıa jumysqa qabyldanǵan qyzmetkerlerdi baspanamen qamtý úshin Talas aýdanynyń ortalyǵy-Qarataý qalasynan 5 qabatty, 2 kireberisti turǵyn úı satyp alyp, paıdalanýǵa berdi.

Paıda bolǵan bos jumys oryndaryn qamtamasyz etý Talas aýdany ákimdiginiń jumyspen qamtý jáne áleýmettik baǵdarlamalar bólimimen birlesken jumystar arqasynda júzege asýda.

Budan bólek seriktestik tarapynan 2015 jyldan bastap memleket búdjetine 683,8 mıllıon teńgeden astam qarajat salyqtyq aýdarymdar esebinde tólendi.

Kompanıa 2019 jyldyń kóleminde tolyq jobalyq qýat kórsetkishine shyǵýdy josparlap otyr. Buǵan basqarý júıesin avtomattandyrý jumystary esebinen qol jetkizilmek. Sonymen qatar, 2019-2022 jyldary «Natrıı sıanıdin óndirý qýattylyǵyn jylyna 30 myń tonnaǵa deıin jetkizý úshin zaýyttyń ekinshi kezeńiniń qurylysyn júrgizý» jobasy arqyly jyldyq qýattylyǵyn arttyrý sharalaryn júrgizý josparlanyp otyr.

Altyn óndirý kólemin jyl sanap arttyrý baǵytyndaǵy memlekettik saıasat qazaqstandyq kompanıalar tarapynan natrıı sıanıdine suranystyń ósýine oń yqpal etýde. Al óz kezeginde natrıı sıanıdi altyn óndirisiniń kólemin arttyrýdyń negizgi hımıalyq qospa sanalady. Oǵan qosa Qytaıdyń Sınszán-Uıǵyr avtonomıalyq aýdanynda qalyptasqan jaǵdaıǵa baılanysty qytaılyq natrıı sıanıdi kompanıalary sonda baǵyttalýynan Tájikstan, Qyrǵyzstannyń altyn óndirýshileri tarapynan dál osy hımıalyq qospaǵa suranys artyp, eksporttaǵy qajettilik ulǵaıa tústi. Máselen Qytaıdyń Sınszán-Uıǵyr avtonomıalyq aýdanynda 120 myń tonna natrıı sıanıdin óndirýge qabiletti zaýyt boldy. Bul óndiris oshaǵy Reseı-Qazaqstan naryǵyna negizgi básekeles sanaldy. Sońǵy 1,5 jyl ishinde natrıı sıanıdiniń baǵasy 30 paıyzdan da kóp ósti. Qazirgi tańda 1 tonna natrıı sıanıdin satyp alý boıynsha kelisimsharttyń quny 2500-2800 dollardy quraıdy.