Qazaqstanda Baıqońyr aılaǵynan ushyrylatyn «Proton» zymyran-tasyǵyshtary 2025 jylǵy deıin toqtatylmaıdy. Bul týraly QR Aeroǵarysh komıtetiniń tóraǵasy Talǵat Musabaev QR Parlamenti Senaty otyrysynda málimdegen. Bul týraly «Qamshy» portaly QAZINFORM-ge silteme jasaı otyryp habarlaıdy.
Senat depýtattary Aeroǵarysh komıtetiniń tóraǵasy Talǵat Musabaevqa ǵarysh salasyndaǵy birqatar túıtkildi máselelerdi tótesinen qoıyp, Qazaqstandaǵy kıikterdiń jappaı qyrylýyna gıptıldiń sebep bolǵandyǵyn alǵa tartqan. Depýtattardyń saýalyna naqty jaýap bere almaǵanymen agenttik tóraǵasy taqyrypty «Protonnyń» shegerilýine qaraı buryp áketti.
«Biz qazir «Proton» zymyrandaryn ushyrýdy azaıtýǵa qatysty jumystar júrgizýdemiz. Bizde qazir zańdy qujattar bar. Ol qujattar negizinde «Proton» zymyrandaryn kezeń-kezeńimen toqtatý máseleleri qarastyrylǵan. Sonymen, 2025 jyly «Proton» zymyran-tasyǵyshy tolyǵymen toqtaıtyn bolady. Biz bul máselege úlken mán berip, qolǵa aldyq»,-deıdi Talǵat Musabaev.
Sondaı-aq tóraǵa myrza bir retten «Proton» zymyrandaryn toqtatý múmkin emestigin aıta kele, Baıqońyrdyń bolashaǵy týraly sóz etken.
«Eger «Proton» zymyrandaryn ushyrýdy toqtatatyn bolsaq, onda Baıqońyr Reseı Federasıasy úshin kereksiz bolyp qalady. Sosyn olar ketip qalady. Al «Proton» zymyran-tasymaldaýshysy ekonomıkalyq jaǵynan jerserikter men ǵarysh apparattaryn jetkizýde qazirgi tańdaǵy eń ozyq zymaran bolyp tabylady. Bul RF-nyń basty kóziri. Olar «Proton» arqyly paıda taýyp otyr»,-deıdi QR Aeroǵarysh komıteti tóraǵasy.
Sonymen qatar, T.Musabaev mynalardy eskertken:
Taǵy 11 jylǵa deıin Qazaqstan men Reseı arasynda memleketaralyq kelisimderge qol qoıylǵan. Iaǵnı, «Baıqońyrdan» 2025 jylǵa deıin «Proton» ushyrý toqtatylmaıdy. Al geptıl men amıl arqyly ushyrylatyn zymyrandar «Baıqońyrdan» qazir ketpeıdi.
«Qazirgi tańdaǵy basty másele bolyp otyrǵany «Báıterek» ǵarysh keshenin jedeldetip qolǵa alý. Bul týraly RF men QR arasyndaǵy 2004 jyldyń 9- qańtaryndaǵy kelisim bar. Eger «Báıterek» kesheni jolǵa qoıylatyn bolsa, geptıl men amıl arqyly ushatyn «Protonjardy» toqtatýǵa ábden bolady. Birinshiden ol jergilikti turǵyndardyń densaýlyǵyna aıtarlyqtaı zıan. Ekinshiden, el ekologıasyna qyrýar zardap keltirýde»,-deıdi Talǵat Musabaev.
Nurzat Toǵjan
