Soltústik Qazaqstan oblysynyń Bulaq aýylynda sońǵy kezde ólim-jitim kóbeıgen dep habarlaıdy Qamshy.kz aqparat agenttigi Astana telearnasyna silteme jasap.

Tipti olardyń arasynda jastarda bar. Halyq  buǵan irgeles jatqan altyn óndirisin kinálaıdy. Tek sońǵy bir jarym jyldyń ishinde 20 aýyl turǵyny baqılyq boldy.

"2014 jyly Bulaq aýylynyń qasynda altyn óndirisi iske qosylǵan kezde jurttyń qýanyshynda shek bolmady. Buqara qosymsha jumys oryndarynyń paıda bolatynyna senip, aýyldyń kórkeıýin kútken edi. Alaıda, ýaqyt óte kele halyqtyń qýanyshynan góri, qaıǵysy basym tústi. Qazir mundaǵy árbir turǵyn ken ornynyń jabylýyn qalaıtyn kórinedi" - deıdi telearna tilshisi.

Tilektes Esjanov, Bulaq aýylynyń turǵyny: "Karerge baramyz, basym aýyryp, davlenıem kóteriledi. Osyndaǵy medıkter meni jibergen joq. Davlenıe 160-170. Laboratorıaǵa probalardy ákelemiz.Sasyp turady bári. Shań zıan ǵoı. Sodan men shyǵyp kettim. Mine bir jyl buryn týǵan aǵam qaıtty. Osy altynnyń kesirinen".

Aýyl turǵyndarynyń aıtýynsha, sońǵy 1 jarym jylda atalǵan kásiporynda jumys istegen 7 adam baqılyq bolǵan. Osydan shoshyǵan keıbir otbasylar týǵan jerin tastap, qonys aýdarýy jıilegen. Qazir aýylda shamamen 800 adam qalǵan. 

Esil aýdanynyń atqaminerleriniń sońǵy jyldary bul mańaıda ólim kóbeıgenin rastady. Aıtýlarynsha, buǵan radıasıa ǵana kináli emes.

Edil Tutqyshev, SQO, Esil aýdany ákiminiń orynbasary: Bulaq aýyldyq okrýgi boıynsha jyl basynan bastap 10 adam qaıtyp ketti. Onyń ishinde obyrdan bir adam baqılyq boldy. Jalpy, bul aýyldyń halqy qartaıyp barady. Sondyqtan ólim-jitim kóbeıip otyr. Al saraptama qorytyndysyna sáıkes, sý, topyraq pen aýadaǵy zıandy zattardyń mólsheri qalypty normadan aspaıdy. Deıturǵanmen, oblystyq onkologıanyń deregi basqa. Altyn óndirisin qolǵa alǵan Esil aýdany obyr aýrýy boıynsha óńirde kósh bastap tur. 10 aıda 78 adam tirkeýge alynǵan. 26-sy ómirden ótipti. Biraq onyń sebebine eshkim bas aýyrtyp jatqan joq.