Sońǵy birneshe jylda, ásirese, bıyl qazaq topyraǵynda túz janýary - kıikterdiń qyrylýy orasan apatqa ulasty. Janýarlardyń 130 myńnan astamynyń lezde joıylyp ketýi – bıologıalyq alapat apat qana emes, adamdardyń tirshiligine tóngen qaýip.
Sondyqtan, Qazaqstannyń bıoalýantúrliligin saqtaý qaýymdastyǵy arasyna zoologtar, ınfeksıalyq aýrýlar men zymyran-ǵarysh qyzmetiniń mamandary engen 9 múshesi bar arnaıy ekspedısıa uıymdastyrdy. 12 kúnge sozylǵan jumys Qyzylorda oblysynan bastalyp, basqa aımaqtarǵa da aýysty.
Jaqynda tuńǵysh ǵaryshkerimiz Toqtar Áýbákirov te mundaı mańyzy zor, qaýipi qatparly tabıǵı apatqa jeńil-jelpi qaramaý qajettigin eskertip edi. Al, atalǵan ekspedısıanyń múshesi, Frankfýrt zoologıalyq qoǵamynyń ókili Shtefan Sýtar Torǵaıdyń jaılaýynan tabylǵan shardyń Amangeldi aýdanynyń dalasynan da tabylǵanyn aıtyp qaldy. Degenmen, artynsha «bul shardyń kıikterdiń qyrylýyna esh qatysy joq» dep shyǵa keldi...
Jazyqsyz janýarlardyń jappaı qyrǵynǵa ushyraýy – tegin emes. Bul – Baıqońyrdyń zardaby ma, álde, basqa polıgondardyń radıasıalyq zıany ma nemese múldem bóten shardyń áıtpese aýrýdyń saldary ma – mańyzdysy bul emes – eń mańyzdysy – qazaq dalasyna tótennen tajal kelip, tabıǵat ajal qushyp jatyr...
Eger búgin «kıik óldi, kúıip óldi» dep, selqostyqqa salynyp otyra bersek, erteń adamdardyń ómirine qaýip tónbesine kim kepil?!.
Bizdiń bıliktegi sheneýnikterdiń eń bolmasa bireýi osylaı bolmasyna kepildik bere ala ma?..
«Meni qurtqan Kóksholaq» dep, Kenen atamyz aıtpaqshy, bizdi selqostyq tyǵyryqqa tirep júrmesin!
Týrasyn aıtsaq, jalaqysyn alǵan Shtefan Sýtar eline qaıtyp ketti, qazaq qaıda qaıtady?..
Qajymuqan ǴABDOLLA
Pikir qaldyrý