Astana qalasynyń irgesindegi Qoıandy aýylynda 10 jasar qyz sýǵa batyp ketken.  Dál sol kezde oqıǵaǵa kýá bolǵandar kómekke umtylǵanymen, qyzdyń tek jansyz denesin sýdan alyp shyǵa alǵan.  Al bul kezde ózge demalýshylar dym bolmaǵandaı, máıitti jaǵaǵa tastaı salyp, alańsyz sýǵa shomyla bergen. Bul týraly «Qamshy» portaly Baq.kz jáne KTK arnalaryna silteme jasaı otyryp habarlaıdy.

 Kisi shoshyrlyq kórinisterdi sol mańda júrgender uıaly telefonyna túsirip alǵan. Marqum qyzdyń denesin demalýshylar mataǵa orap, topyraq ústine tastaı salypty. Áleýmettik jelilerge taralyp ketken bul jan túrshigerlik vıdeo qazaqstandyq áleýmettik ortanyń ashýyn týǵyzǵan. Tipti,  feısbýk jelisiniń qoldanýshylary bul aıaýassyzdyqqa el bolyp kúresýge úndeý jasaǵan.

Al vıdeoda adamdar bala-shaǵasymen máıittiń janynda máz-máıram bop sýǵa shomylyp jatqan. Ne jaǵajaı ákimshiligi, ne úlkender jaǵy bas bolyp deneni tasa jerge aparýdy da oılanbaǵan. Qaıta qyzyqtap uıaly telefonǵa túsirgen.

Al kýágerlerdiń aıtýynsha, jasóspirimniń máıitin alyp ketýge jedel járdem 1 saǵattan soń bir-aq, jetken. Negizi marqum jetkinshek, jaǵajaıǵa ákesimen kelipti.

Keıin ol balasyn jalǵyz qaldyryp ketip qalǵan. Oralǵanynda, qyzynyń óli denesin ǵana qushaqtap qaldy. Al jeke jaǵajaı ákimshiligi ózderine shań jýytar emes.

“Qorshaýlar ornatqanbyz. Demalýshylar buzyp ketip jatyr. Al sýǵa tunshyǵyp ólgen qyz saıajaı jaqtan kelgen. Kúnde ákesimen birge osy jerde shomylyp júretin”,  deıdi jaǵajaı qyzmetkeri  Azat Jamantaev.

Mysaly, Aıdos Juqanuly atty feısbýk paıdalanýshysy «Marqumnyń aldynan jarylqap, arty qaıyrly bolsyn. Eı, adamdar (qazaqtar) azyp bara jatqan sıaqtysyńdar...» dese, Ánýar Shotbaı esimdi qoldanýshy «Bul dıagnoz. Haıýannan tómen túsip kettik» deıdi.

Nurzat Toǵjan